Kommune Kujallermi innuttaasut kulturikkut maligassiuisumut piukkussallit innersuusaminnik allakkatigut nassiussisinnaapput. Innersuunneqartut akornanni toqqagaasut inuiattut ullorsiornermi nersorneqartut tassaapput; Nanortalimmi David Kristoffersen, Qaqortumi Daniel Permien, Narsamilu Marthin Boassen.
- Kommuunitsinni akissarsiassaq pinngikkaluarlugu inoqatitsinnik nuannaartitsinissamik allallu ilorrisimaarnissaannik siunertalimmik suliaqartut qujaffigisassavagut. Nunaqarfinniit ajoraluartumik tigusaqartannginneq uggoraara, neriuppungalu aamma innersuusisoqartalerumaartoq. Nersornaasigaasut tamaasa pilluaqqungaarpakka, Kommune Kujallermi Borgemster Stine Egede oqarpoq.
Kulturikkut maligassiuisutut nersornaasigaasut tammajuitsussaannik tunineqarput.