Ullumikkumiit kujataani, Qaqortumi 2025-mi mittarfittaarnisamut attaveqaasersuutit annertuumik allannguiffiusussaammata inuussutissarsiorneq pillugu isumasioqatigiinnerni suut aallarniissutaasinnaanerinik eqqartuiffiupput, pingaartumik inuit angallannerannut silaannakkullu assartuinernut allannguutissat eqqartorneqarlutik. Ungasinnerusoq eqqarsaatigalugu kommunimi pisortanit namminersortuniillu annertuunik maannamullu nalileruminaatsunik aningaasaliisoqassaaq, tamannalu inuussutissarsiorfissanik assigiinngitsunut suliassanik malitseqarumaartussamik. Kommune Kujallermi attaveqaasersuutit tunngaviusumik allanngortinneritigut najugaqarfiit tamarmik sorpassuartigut attuallanneqarumaarput.
Inuussutissarsiornermik ingerlatsisut isumasioqatigiinnerit tigulluarpaat, isumasioqatigiinnerni piffissami aggersumi inuussutissarsiornikkut ineriartortitassat, kommunimilu ineriartortitsinissamut pisariaqartanut tunngatillugu peqataasut suut siunnerfigineraat qitiusumik eqqartorneqarput.
Isumasioqatigiinnerni sammisat uteqqiasut tassaanerupput aalajaatsunik sulisoqarneq, pitsaasunik attaveqaasersuuteqarneq, akunnittarfiit neriniartarfiillu amerlanerusut, annertunerusumik suleqatigiinneq, siunnersuinerit annertunerusut kiisalu tunisassiassanik ineriartortitseqqiineq.
Borgmesteri Stine Egede ima oqarpoq: ”Kommunerput takornariaqarnermi, piniarnermi, aalisarnermi, nunaateqarnermi, aallarnisaanermi kiisalu sulisussanik orniginarsaanermi iluatsitsilluarnissaanut inuussutissarsiortut kommunitsinnut pingaaruteqarluinnartunik pillaqqissuusut ilisimasaqarluartullu isumasioqatigiinnerni paasinarsivoq".
Isumasioqatigiinnerni oqariartuutit ataatsimut katersoriarlugit allanneqassapput, tamatumalu kingorna aallarnisaanermi, takornariaqarnermi, nerisassiornermi, aatsitassanut tunngasuni aammalu attaveqaasersuutinut suleqatigiissitalianut suliassanngorlugit ingerlateqqinneqassallutik.
Inuussutissarsiorneq pillugu Kommune Kujallermi 2023-mi isumasioqatigiinnerit
Nunap immikkoortuani mittarfiup Narsarsuarmiit Qaqortumut 2025 naalernerani nuusinissamut atatillugu borgmesteri Stine Egede kommunimi inuussutissarsiornermik ingerlatalinnut isumasioqatigiinnernik sisamanik ingerlatsivoq.
Udgivet d. 14. juni 2023