Politikkikkut anguniagassatut 2023-imiit 2025-mut isumaqatigiissut atsiorneqartoq kommunimi piginnaasanik atorluarneqartunik pilersaarusiorfigineqarnissaa ilaatigut isumaqatigiissutaasoq borgmesterip Stine Egedep oqaatigaa.
- Upperaarput nammineerluta pilersitatsinnik kommunerput siuariartortissinnaallugu, aqutsinikkullu naleqartipparput innuttaasut siuariartornernut piginneqataasut akuutinneqartutullu misigisimasut. Taamaammat kommunitsinni piginnaasatta atorluarneqarlutik pilersaarusiorfigineqarnissaat Inuit Ataqatigiit Demokraatillu siuttuuffigissavaat, Kommune Kujallermi Borgmesteri Stine Egede oqarpoq.
Demokraatineersup Margrethe Thaarup Andersenip kommuuni ataatsimoortoq nutaaliortorlu isumaqatigiissutiminni kissaataasa ilagigaat oqaatigaa.
- Kommune Kujalleq ataatsimoornikkut nutaaliornikkullu ineriartorfiunissaa kissaatigaarput, innuttaasut sinniisaasa suliassaraat ataatsimoorfiusumik siuariartortitsineq, Kommune Kujallermi kommunabestyrelsimi ilaasortaq Demokraatineersoq Margrethe Thaarup Andersen oqarpoq.
Kommune Kujallermi Inuit Ataqatigiit Demokraatillu juunip ulluisa 19-anni 2023, suleqatigiinnissaminnik isumaqatigiissutiminnik atsioqatigiipput.
Isumaqatigiissut nutaaq uani atuarsinnaavat