Inuiattut ullorsiornermi Borgmesterip Stine Egedep oqalugiaataa

Asasakka Kommune Kujallermi inuttaaqatikka, inuiattut ullorsiornitsinni tamassi qamanngavik pilluangaaritsi.

Kulturi
Ullumikkut ukiuni 38-ini inuattut ullorsiorluta nalliuttorsiorpugut, ullorlu manna aamma ullunit allanit takineruvoq tassa ullortuneq, tamannalu ukiorpassuarni kalaaliusugut nalliussisarparput.
Inuattut ullorsioraangatta aamma inuattut piorsarsimassuserput oqaatsivullu nalliuttorsiutigisarparput. Nalliuttorsiortarpugut qangaaniilli siulitta ingerlassimasaat ataqqillugit, minnerunngitsumik kinguaavut kinguaassavullu eqqarsaatigalugit, taakkuuppummi kalaallisut inuiattut ingerlatitseqqiisussat.
Seqineq qullarnerpaaffimminiilerpoq nunannguarpullu aasarissileruttorpoq, inuiattut ilisarnaatittailaat pilineq ilaatigut takussaalereerluni. Kujataata imartaa nunataalu nunatta sinneratuulli pissaqarfiulluarput, aasaaneranilu piliniarfissaqqeqaluni. Ilaqutariippassuit upernaliinnartoq ukiussaq piareersarfigalugu aallartereertarpugut, ukiullu kaajallakkiartornerani piliavut iluaqutigilluartarpavut. Amerlasuut ullumikkut piliaminnik pilluataaruteqarumaartut qularinngilara.

Peqatigiiffiit
Aasarluarnerata ilisarnaataasa aamma ilagaat katerisimaarnerit pikialaartitsinerillu, peqatigiiffiit, suliffeqarfiit namminerlu kajumissutsiminnik suliniartut nuannaarnermik, katerinnermik ataatsimoornermillu siunertallit aasaanerani ukiullumi sinnera ataatsimoorfigisartakkavut qujanartaqaat. Taakkuuppummi illoqarfittatsinni nunaqarfittatsinnilu ataatsimoortitsilluartartut, pisortat utaqqiinnarnagit pikialaarfinnik aallussiuartartut. Taamaammat ilissinnut qujaniarnera angeqaaq.

Timersorneq
Nuannaarutigingaarpara timersornerup tungaatigut kujataaniit peqataasartut takussaaneruleriartoqqimmata, unammiuaarnerniit ujammit arlallit angerlaanneqartartut amerliartuleqqittusullusooq ipput. Meeqqaniit utoqqasaanut timersornikkut kujataaniit saqqummertarnerput tulluusimaarnartaqaaq, peqatigiiffiillu timersornermut tunngasut amerliartormata nuannaarutigingaarpara.
Arctic Sportimik ingerlataqartut, nerrivimmi arsaarartartut, badmintonertartut, isikkamik arsartartut, assammik arsartartut, tae kwondotartut, qajartortartut, qallortartut, arpattartut, høvdingertartut, crossfitertartut, marathonertartut, utoqqaat timersortartut allallu timersuummik illoqarfinni nunaqarfinni savaateqarfinnilu aallussisuususi qamanngavik qutsavigerusuppassi, meeqqanut inuusuttunullu maligassiuisuuvusi tulluusimaarnartumik.
Taamaattumik timersuutinik ingerlatsinermik pinngitsoorneqarsinnaanngitsut qasusuillutik sungiusaasartut qamanngavik qutsavigaassi. Aammattaaq angajoqqaat tapersersuijuarnissinnut qujanaq.
Puigornagit qutsavigerusuppakka timersortartortatsinnut aningaasaliillutik tapiissuteqartartusi, ilisseqanngippammi aaqqissuussat siunertallu piviusunngortikkuminaasinnaasarmata. Suliamut anguniakkamut, aallutamullu isumalerujussuuvusi.
Nunanut allanut unammiartortartut, Arctic Winter Games-imut unammiartortartut, nunarput sinnerlugu timersornikkut takutitsisarnersi qamanngavik tulluusimaarutigisaqaara.
Qaqortumi timersoqatigiiffik K-1933 ukiunik 90-liilluni nalliuttorsiornerani pilluaqqorusuppara, qujanaq timersoqatigiiffik meeqqanut, inuusuttunut, inersimasunut utoqqarnullu timersornikkut, timersoqatigiiffilerinikkut, katerisimaarnikkut ataatsimoornikkullu pissarsiffiulluartarmat. Qanortoq suli ukiorpassuarni katersuuffiugili.
Ukiormanna aamma Siuteroq 43 Nanortalimmi nalliuttorsiortussaavoq, qanortoq aamma nuannersumik nalliussineqarili. Pilluaritsilu tamassi.

Peqqinneq
Timi peqqinnanngitsumik atornera periarfissaq manna atorlugu eqqaalaarusuppara, tupa, ikiaroornartoq imigassarlu atorneqarnerujussui ajornartorsiutigaarput. Peqqinnartumik inuuneqarnissaq, sumiluunniit sulisinnaaneq kikkunnulluuniit pitsaasuuvoq. Timikkut tarnikkullu unamminartut imigassamik pujortarnermillu toqqortiinnarnagit ammasumik eqqartornerusariaqarput. Eqqaamajuk kammalaateqaravit, qatannguteqaravit, angajoqqaaqqaravit, sanileqaravit, ilaqutaqaravit allanilluunniit annissuiffigisinnaasannik inoqarmat taakku alloriarnissannut atorluakkit saaffissaqartuaannarpormi.
Ilavut ingerlallualeraangata nakkarsarnagit tapersersortartigit, sumiluuniit ingerlalluartoqalerpat nakkarsaanerit nikassaanerillu kikkulluuniit iluaqutiginavianngimmassuk.

Oqartussaaqataaneq
Inuiattut ullorsiornermi pissusissamisuussaaq oqartussaaqataaneq aamma iserfigilaassallugu.
Najukkami ataatsimiititaliat, nunaqarfimmi aqutsisut, kommunalbestyrelse, kommunalbestyrelsemi ataatsimiititaliat, nakuusaaqqat, elevrådit, siunnersuisoqatigiit assigiinngitsut kommunitsinniittut atorluarnissaat oqallinnermullu peqataalluartarnissaq kaammattuutigerusunnarpoq. Innuttaasut oqartussaaqataanermut takutitsigaangata -akerliussutsimilluunniit takutitsineruppat- inuiaqatigiittut takutittarparput isummat tusarnissaanik pingaartitsilluta. Nunarsuarmi inuiaat amerlasoorpassuarni inuit nipaannik isornartorsiunermik nipeqarneq, pisinnaatitaaffeqarneq, inerteqqutaasarpoq. Nuannaarutigitigu nunatsinni katersuussinnaatitaneq, oqartussaaqataaneq, inuiaqatigiittullu killiffigilikkatsinnut ullumi aamma nalliusisinnaagatsigit.

Naggasiineq
Angusagut suugaluartut nuannaarutigisartigit.
Meeqqavut peqqinnartumik, nuannersumik toqqissisimasumillu avatangiiseqarnissamik ilinniartitsigit.

Kommune Kujallermi innuttaasut, tikeraat kalaaleqativullu tamannguassi inuiattut ullorsiornitsinni eqqaammallusi pilluangaaritsi, ulloq qanigisasilu, naak ilavut maqaasisaqaraluartut, nuannersumik persuarsiortumillu atorluarisiuk.

Qujanaq