Narsami inuusuttut aserorterinernik pinaveersaartitsisut

Marluullutik assassornermik pinaveersaartitsinermillu soqutigisaqartuupput.
Taamaammat Majoriami inuusuttut sanaartornermi ilinniartut illoqarfiup katersortarfiata igalaavi taasersorlugit aallartimmata, Permagreen atortussanik tummarfissanillu tunissuteqarpoq.

Sanaartornermi ilinniartut sullivimmi aqutsisumit Vittus Nielsenimit ilinniartinneqarlutillu ilitsersorneqarsimapput. Igalaaq siulleq ilitsersuinermik pisariaqartitsiffiungaatsiarsimavoq, ilikkalertupallakkamillu naggataatigut inuusuttut nammineerlutik igalaannik taasersuisinnaanngorput.
"Inuusuttut illoqarfiup katersortarfianik aserfallatsaaliueqataanerat iluarsaaqataanerallu nuannersumik isigisaqartitsilerpoq kiisalu suliaannut ataqqinninnermik pilersitsilluni. Kissaatigaarput inuusuttut suliarujussuat pinaveersaartitsissutaasinnaassasoq.” Vittus Nielsen oqarpoq.

Igalaanik taarsersuineq atortunik sakkunillu atueriaatsip iluani nutaanik piginnaasaqalersitsillunilu ilisimasaqalersitsivoq kiisalu igalaanik taarsersuernermi suliarujussuarmut paasinninnermik ataqqinninnermillu pilersitsilluni. Maannakkut igalaat tamarmik taaserneqareerput silataanniillu takujuminartuullutik, suliassap tullia tassaavoq iluatungaani igalaat sinaakkutaanik taarsersuinissaq.

Narsap katersortarfia 2019-imi Sanasamik allagartalerlugu inuusuttunit aamma Majoriameersunit kusassarneqarpoq.
Taamani Permagreen Narsaq tapersersuiniarluni amiutinik, tummarfissanik atortussanillu tunissuteqarpoq.
Kisianni igalaat qalipakkap sinaanniittut pitsaajunnaarsimapput. Igalaat qassiit aserorsimapput krydsfinérilersorneqarsimallutillu. Igalasserfiit pisoqalisimapput, aqilisimapput kiisalu aserorsimallutik. Qalipakkamut kusanartumut Sanasamut allaannerulluinnarnermik tamanna pilersitsivoq.

Tamanna pillugu Esther Nørregård Oak Foundation Denmarkimeersoq Sanasa 2023-mut kaammattuivoq qalipakkap sinaanniittut igalaat taarsersornissaannut atortussannik qinnuteqassasoq.

Taamaasilluni atortussat qinnutigineqarput aningaasaliivigineqarlutillu, igalaat taarserneqarput illoqarfiullu katersortarfiata igalaavi kusanarnerulerput.


Piviusut:
Suliniut Sanasa 2018-imili kujataani illoqarfinni pingasuni Qaqortumi, Narsami Nanortalimmilu qassiinik kusassaasimavoq eqqumiitsuliorsimallunilu kiisalu assassornermik aserfallatsaaliuinermillu annermik qitiutitsiffiusunik nutaaliornermik workshopertitsisarluni.
Suliuniutit taakku Kommune Kujallermit Oak Foundation Denmarkimit tapersersorneqarput.
Saniatigut suliniutit najukkami nunalu tamakkerlugu najugalinnit aningaassaliiffigineqarlutillu tapiiffigineqarsimapput.