2024-mi missingersuutit amerlassusissaannik akuersinermut atatillugu kommunalbestyrelsimi amerlanerussutillit aalajangerput 2024-imi kommunimut akileraarut 28%-imiit 27%-imut procentimik ataatsimik appartinneqassasoq. Taanna 6-7 mio. kr.-inik naleqarpoq.
Kommunip naatsorsuutaani takuneqarsinnaavoq akileraarutitigut isertitat ukiuni kingullerni marlussuni qaffariartulersimasut, kiisalu akileraarutitigut isertitat ukiuni aggersuni qaffaqqinnissaat naatsorsuutigineqarsinnaavoq Kommune Kujallermi mittarfiliorneq aatsitassarsiornerlu pissutigalugit.
Akileraarutip appartinneqarnissaanut tunngavilersuut ilaat tassaavortaaq Naalakkersuisut missingersuutitigut inissiineratigut, kiisalu 2024-mut aningaasanut inatsisikkut, kommunimi aningaasat ukiuni aggersuni inerlatsinermut sanaartornermullu atorneqarsinnaasut killilerneqarsimanerat.
2024-imi Kommune Kujalliup missingersuutaanik Naalakkersuisut qanittukkut inissiinerat aqqutigalugu kommunip aningaasat atorsinnaasai qaffariaateqarput. Aningaasalli atorneqarsinnaasut taakku innuttaasunut iluaqutissanngortinneqarnissaannik kommunalbestyrelsi aalajangerpoq.
Borgmesteri Stine Egede ima oqarpoq: "Aningaasat atorneqarsinnaasut amerlinerisa akileraartartunut iluaqutissanngortinneqarnissaanik siunnersuuteqarpunga, kommunalbestyrelsimullu 2024-imi kommunimut akileraarummik appaanissamik siunnersuuteqarlunga. IA Demokraatillu isumaqatigiipput 2024-milu akileraarutip 28%-imiit 27%-mut appartinneqarnissaanik aalajangiillutik.
Aningaasaqarnitsinnik sukangasuumik aqutsinerput ingerlateqqissavarput nuannaarpungalu kommunip inuinut inugilerumaagaanullu nalunaarutigisinnaagakku kommunimut akileraarut 2024-mi procentimik ataatsimik appartinniaripput."
2024-imi Kommune Kujallermi akileraarut taamaalilluni 43%-iulissaaq. – 2024-imilu missingersuutit tamakkiisut 2023 novembarimi aappassaanneerneqassapput.