Qaqortumi Narsamilu Kommune Kujalleq timersortarfiit suleqatigalugit qallortarfiit ikkussuullugit piviusunngortippaat, Nanortalimmilu qallortarfik timersortarfiup nammineerluni ikkussuullugu. Narsap Timersortarfiani qallortarfiit ikkussuunneqaqqammerput, taamaalillutillu Kommune Kujallermi illoqarfiit tamarmik timersortarfinni qallortarfeqalerlutik.
- Illoqarfiit siulliullutik qallortarfeqalersut maanna atorluarneqalereerput, ilaatigut illoqarfinni unammiuaarnissat takorloorneqalereerlutik. Narsami qallortarfik aamma atorluaqqunaqaaq, Kulturimut sunngiffimmullu immikkoortortami pisortaq Freddy Christensen oqarpoq.
Qaqortumi maajip 26-anniit 28-annut qallornermik unammiuaarnerit ingerlanneqassapput, Nanortalimmiit, Qaqortumiit Narsaminngaanniilu qallortartunit peqataaffigineqartussamik. Taamaasilluni illoqarfinni assigiinngitsuninngaanniit qallortartut unammiuaarnerat siullersaat Qaqortumi ingerlanneqassalluni.