Ukiut 133-it matuma siorna Sulisartut Ulluat sullermeerluni nunarsuarmi sulisartunit nalliussineqarpoq.
Ullormut sulinerup akunnernik arfineq-pingasunik sivisussuseqalernissaanik ilungersornermi nunani tamani sulisartut kattunnissaat aallaqqaamut maajip aallaqqaataasiortarnermi siunertaasimavoq. Tamatuma kingorna sulisartutut pisinnaatitaaffiit amerlaqisut anguneqarsimapput, soorlu akissarsiaqarluni feeriarsinnaatitaaneq kiisalu napparsimanerup nalaani akissarsiaqarsinnaatitaaneq.
Ullumikkut sulisartut atugaat sulisartut sulisitsisullu isumaqatigiissusiortarnerat aqqutigalugu isumagineqartarput, maajillu aallaqqaataat annermik sulisartut kattuffiisa ataatsimoorfiattut atorneqartalersimavoq taavalu oqalugiarfiusarluni erfalasimaarfiusarlunilu.
Aamma maajip aallaqqaataa Namminersornerulerfigaarput, taamaammallu ataatsimut pingaartitat uppernarsarumallugit nukittorsarumallugillu ullup atornissaanut nunatsinni suli allamik pissutissaqarpugut.
Taamaammat sulisartut tamaasa sulisartutut ullorsiornerannik pilluaqquakka ullormillu pissarsiviulluartumik kissaallugit.
Qinikkatut suliassarput tassaavoq tamat oqallinnerannut peqataassalluta siunniunneqartunullu peqataajumassusermik takutitsisalluta. Kisianni qaaqqussummik tigusaqanngilagut. Ukioq manna imaluunniit siorna borgmesteritut nalliuttorsiornermut qaaqquneqarsimanngilanga. Ukioq manna QSIP-mik naapitsiumalluta ataasiarata saaffiginnittarnivut tiguneqarneq ajorput. Taamaammat periarfissaq manna atorlugu matutta ammajuarnera eqqartugassarpassuaqarnerpullu oqaatigerusuppara. Pikkorissarnerit ilinniarnerillu, suliffimmi avatangiisit kiisalu attaveqarneq tassaapput QSIP-mut oqaloqatiginninnitsinni eqqartorusutavut.
Kommunitsinni Nunatsinnillu sulisartut tamavissi ullorsiorluarisi.