Asasakka Arktisk Guidetut allagartartaartut, ilinniakkassinnik naammassinnillusi allagartartaarnissinnik pilluangaaritsi.
Ilinniagaqalerlusi allagartaqalertusi sinerissami sumiiffinniit assigiinngitsuneerpusi, tamassilu assigiinngisitaartumik pinngortitami avatangiiseqarpusi, taamaalillusi periarfissat assigiinngitsut aallaavigalugit sulinissassinni aallaaveqarsinnaassaasi.
Nunarpummi isorartoqisoq assigiinngisitaaqisunillu takornariaqarnikkut suliassaqarfiusoq, ilissi maanna ineriartorfigissallugu periarfissanik pilersitsivigisinnaanngussavarsi. Suliffimmik misiliinissinni misilittagarilikkassinnik peqalersimavusi, maanna misilittakkasi sakkussaralugit ilinniarnersi naammassivarsi. Ilinniarneq naammassigaluartoq aatsaat ilinniavinneq aallartissaaq, nammineerlusimi sakkut pigilikkasi atorlugit sammivissarsi inissikkiartorumaarparsi.
Angusarsi pillugu ullumi katersuunnermi immissinnut tulluusimaarutiginissassinnut pissutissaqarluarpusi, anguniagaqarnissinnimmi pingaartitsillusi tunniussimanersi ullumi imminut akilertutullusooq takussutissillugu timitalerassiuk.
Kujataani borgmesteritut siunissamut aggersumut kujataata takornariaqarfissuanngornissaanut siunnerfigisatsinnut isumalluarpunga; kujataatami avatangiiserisaa kusanangaartoq UNESCO-p nunarsuarmioqatigiit kingornussassannut allattorsimaffiani ilanngummalli nunarsuarmioqatigiinnit soqutigineqarnera annertusiartorpoq.
Unescoqarfiunitta saniatigut Savaateqarfiit ilaanni takornarialerineq ingerlanneqartarpoq, nunatsinnimi kisiartaangajalluta kujataani nunaateqarnermik nersutaateqarnermik allatigullu uumasuuteqarnermik ingerlatsiviunerput atorluartariaqarparput. Inerisagassalli suli annertupput periarfissarpassuaqarpugummi. Tamatumanilu inerisaasussat tamaasa tikilluaqquvagut. Siunissamimi ukioq kaajallallugu assigiinngitsutigut takornarilerineq inerisartuarneqartariaqarpoq.
Qaqortumi mittarfissaq takornariaqarnerulernissamut ammaassisussaq aamma Namminersorlutik Oqartussat suleqatigalugit maani Qaqortumi visitorcentereqalernissaq pilersaarutaasunut ilaapput.
Nunarput isorartoqaaq, takornarialeriffissat kuersaarsuartut amerlatigipput. Periarfissarpassuit nunarsuarmi allami assissaqanngitsut pigaavut, Siorapalummiit Kap Farvel uiarlunga Ittoqqortoormiut tikillugu, taakkulu avataani inoqarfiit avataanni kangerluit, qaqqarsuit, innarsuit, kuussuit, tasersuit, qoororsuit, aputitarsuit, sermersuit, iluliarsuit, sikorsuit, sermit iigartarut, tuttoqarfissuit, umimmaqarfiit, piniagassat nunami allarpassuit, imaani aalisakkat, piniagassarpassuillu allat. Nunami pisutsitserusukkaanni, qaqqasiortitserusukkaanni, sisorariartitserusukkaanni, qimussimik qamuteralannik angalatitserusukkaanni, arsarnernik takusassarsiortitserusukkaanni, qajartortitserusukkaanni, umiatsiamik angallasserusukkaanni, hestertitserusukkaanni ila taagugassat killeqanngiusapput.
Taammattumik siunissami takornariaqarnikkut siuarsaaqqinnissami assaat amerlanerusut, ilisimasallillu amerlanerusut maani kujataani atorfissaqartippagut, taamaattumik neriuppunga siunissami maani aamma ilasi takusarumaarlutigit aammalu sulilluarumaartusi.
Aallartikkama oqareernittut nunarput isorartoorsuuvoq, periarfissarpassuarnillu killissaqanngiusattunik peqarpoq. Sumiiffiit aallaavigalugit ineriartortitsinerit neriuppunga ilissi aamma suleqataaffigiumaarisi. Nunarsuarmi allani misilittakkat ilaatigut isumassarsiorfigigutsigit siunissami inuussutissarsiut una angisoorujussuanngorsinnaavoq. Ilattalu inuussutissarsiutigilluarsinnaalissavaat pimoorullugu sapiissuseqarluni ingerlakkaanni, naak ilaatigut nakkarfissat aqqusaarneqarsinnaasassagaluartut, uniffigiinnarnagit ingerlaniinnaraanni.
Killissaqanngiusattumik oqarninni isumaginngilara suna tamaat akigalugu nunarput takornarialeriffigissagipput. Pinngortitarsuaq issittumi aserujavoq, innarlerneqarsimagunilu ukiorpassuarni pissusitoqqaminut uterniartarpoq. Piujuaannartitsineq tamatigut eqqaamagisiuk, mingutsitsinnginnissaq anguniartuarisiuk aammattaaq atuisunut tamanut maligassiuisuugisi, taamaaliorutta kinguaassagut aamma sutigut tamatigut pissaqartittuassavagut.
Ilinniakkassinnit sakkut pigilikkasi qanortoq atorluarisigit, ajunngitsunik tamanik kissaassillunga tamassi angerlamut ingerlasussat ingerlalluarisi.
Ilinniartitsisorisimasasi aammalu ulluinnarni maani sullissisusi aamma qujaffigerusuppakka, ukiut tamaasa ilinniagalinnik naammassititsisarassi qamanngavik qujanaq. Taama oqaaseqarlunga tamannguassi pilluaqqoqqippassi.