Timigissartarfiit silamiittut innuttaasunit atorluarneqalereersut ukioq kaajallallugu atorneqarsinnaapput, taakkulu illoqarfimmi amigaataasimasut Nanortalimmi kulturilerisup oqaatigaa.
- Ilivileq B 1216 toqqavikuani inissisimapput, angallaviusumiikkamik arpareerluni aqqusaarneqarsinnaasunngorlutik inissisimapput. Taakku malunnartumik illoqarfimmi amigaataasimapput, pitsaaqutigaattaaq timigissartarfimmi ataasiusumi periutsi arfinillit atorneqarsinnaanerat, Nanortalimmi kulturilerisoq Samuel Simonsen oqarpoq.
Siorna aggustimi Nanortalik tunngavilerneqarneraniit ukiunik 225-inik nalliuttorsiorpoq, tamatumunngalu atatillugu Nanortallip illoqarfittut ikinngutaa danmarkimiittoq Roskilde timigissartarfinnik silamiittussanik tunisisuuvoq.
- Aalanerunissamik, peqqinnerunissamik pitsaasumillu inooriaaseqarnissamik siunertaqarpugut, ukulu innuttaasunut tunissutit atorluaqqunaqaat. Qanortoq allanngujaatsillugit paarilluarisigi, Nanortallip illoqarfittut ikinnutaannut Roskildemut qujanarujussuaq, Borgmester Stine Egede oqarpoq.
Timigissartarfiit Nanortalimmi maanna atorneqarsinnaanngorlutik ikkussoreersimalerput.