Kommune Kujallermi kommunalbestyrelsip inerisaanermut ataatsimiititaliaa meeqqeriveqarnermut, atuarfeqarnermut, Majoriamut kiisalu kulturimut sunngiffimmullu tunngasunut akisussaaffeqartup Tasersuup Atuarfiata aqutsisui ataatsimeeqatigai, tassani atuartut akornanni nakuusernerit pimmatiginninnerillu annertussusaat eqqartorneqarlutik.
Nakuusernerit pimmatiginninnerillu atuartuni, angajoqqaani, atuarfimmi ilinniartitsisuni kiisalu aqutsisuni initupput. Ineriartorneq pitsaanerusumut saatsinnissaa pisariaqarpoq, matumanilu uagut ataatsimiititaliatut ilinniartitsisut, atuartut angajoqqaallu peqatigiilluta isumaqatigiissutigisariaqarparput tamanna ajornartorsiutaasoq iliuuseqarfigineqartariaqartoq.
Ataatsimiititaliatut qulakkiissavarput atuarfeqarnermut suliassaqarfimmi nakuusernermut pimmatiginninnermullu tunngatillugu periuseqarluni suliaqarnermi qanoq unitsitsiniaasoqarsinnaanneranik pilersaarusiortoqassasoq, aammalu kinguneqartussamik iluatsittumillu suliaqartoqassasoq.
Politikeriusugulli kisitta tamanna suliarisinnaanngilarput. Kulturikkut allannguiniarnermi ataatsimoorussamik suleqatigiinnissaq pisariaqarpoq, matumanilu angajoqqaat suleqatigissallugit pingaaruteqarluni. Maajimi atuarfimmi siulersuisut ilinniartitsisunut, atuartunut kiisalu angajoqqaanut aaqqissuissapput, tassani peqataasussat ajornartorsiut pillugu eqqartueqatigiissapput, atuarfik tamanit taperserneqartumik politikkeqalerniassammat.
Atuarfimmi aqutsisut oqaatigaat atuartut akornanni nakuusertartut ikitsuusut, kisianni initoorujussuusartut. Pingaaruteqarpoq isumaginninnikkut oqartussat pinartumik pinaveersaartitsinermillu akimut suleqatiginissaat, tamatumanilu ataatsimiititaliap malitseqartitsisoqarnissaanik qulakkeerinnissaaq.
Pimmatiginnittarneq akiorniarlugu periusissiamut tunngatillugu ingerlatsiviup Ilinniartitaanermut Aqutsisoqarfiup pimmatiginnittarneq akiorniarlugu siunnersortai ataatsimeeqatigissallugit aaqqissuivoq, ataatsimiinnissaraluarli marsimi taamaatinneqarpoq angallanneq peqqutaalluni, taamaasilluni apriilip 24-anniit 30-ata tungaanut naapisimaarneqartussanngorlutik. Atuarfitta tamanut toqqissisimanartuunissaa anguniarlugu Ilinniartitaanermut Aqutsisoqarfiup ataatsimeeqatigisarnissaani suliniutissani iluatsitsiffiusinnaasuni isumaliutigisinnaasatsinnik sakkussatsinnillu pissarsiaqarluarsinnaanissatinnik neriuuteqarluarpugut.
Tasersuup Atuarfia nakuusernermut akuersaanngilluinnarpoq. Nakuusertoqarsimatillugu imaluunniit pimmatiginnittoqarsimatillugu atuartoq angajoqqaavilu oqaloqatiginissaannut aggersartarneri naammanngitsoq atuarfimmi aqutsisut nassuerutigaat. Nakuusertoqarsimatillugulu atuartup angerlartitaanera pillugu tamatigut isumaginnittoqarfimmut nalunaarutiginnittoqartarnera aamma naammannani. Angajoqqaat meeqqanullu oqartussat atuarfiup politikkia sukumiinerusumik ilisimanerulerluinnartariaqarpaat akueralugulu, matumanilu suliniutinut piginneqataanerulertariaqarlutik. Tamat suleqataalluarnissaat pisariaqarpoq, taamaammat ataatsimoorussamik anguniagaasoq tamanit taperserneqartariaqarpoq.
Ataatsimoorussamik anguniagaqarneq tassaasinnaavoq ass. atuartut akornanni ataatsimuussusermik pitsaanerulersitsineq, angajoqqaalli akornanni aamma. Tamanna assigiinngitsutigut iliuuseqarfigineqarsinnaaqaaq, atuarfillu, atuarfimmi siulersuisut kiisalu ataatsimiititaliaq peqatigalugit angajoqqaat annertunerusumik peqataanerulernissaat anguniarlugu siunnerfigissavaat.
Nakuusaaqqat (atuartut sinniisoqarneranni suliat) aallartipput, piffissamilu qaninnerpaami Meeqqat Isummersoqatigiit pilersinneqassapput, taamaasilluni FN-ip meeqqanut pisinnaatitaaffigititai qitiutinneqassapput, meeqqallu taamaasillutik atuarfimmi inuiaqatigiinnilu nakuusernermut pimmatiginninnermullu annikillinissaannut tunngatillugu aalajangiisinnaassusaannut isummersorsinnaassusaannullu pitsanngorsaataassalluni.
Ataatsimiititaliap siulittaasua Bibi Kielsen oqarpoq: "Eqqaamassavarput aamma ullut tamaasa Tasersuup Atuarfiani nuannersoqartarmat, meeqqallu amerlanerpaat ulluinnarni toqqissillutik atuarfimmiittarmata. Pimmatiginnittarneq nakuusernerlu annikillisarniarlugit ataatsimiititaliarlu piffissami aggersumi pinaveersaartitsinissamut suliniutinik annertusaanissamut sukumiinerusumik qitiutitsissaanga, taamaammallu piffissami aggersumi atuarfiup aqutsisui qaammatikkaarlugit naapittassallugit isumaqatigiissuteqarfigaakka, tassani piffissap ingerlanerani eqqartorniassagatsigu sutigut atuarfiup uagutsinnit politikerinit suut pisariaqartinnerlugit".