Kommune Kujallermi sanaartornermi ingeniøri Nanortalimmut, Narsamut Narsarsuarmullu februarip qaammataani inissiat alakkarterlugit naliliiffigiartorlugillu angalaqqammerpoq.
Nalilersuiereernerup kingorna Nanortalimmi inissiat sisamat, Narsami inissiat arfineq pingasut aamma Narsarsuarmi inissiat marluk annikitsumik iluarsagassatut iserterfigineqarsinnaanngorlugit iluarsartuunneqartussanngorput.
-Inissiat amerlasuut pisoqalisimapput annertuummillu iluarsartuussassaallutik, ukulu inissiat Nanortalimmi sisamat, Narsami arfineq pingasut Narsarsuarmilu marluk annikitsumik iluarsartuussassaasut paasinarsivoq. Taakku piareeriarpata tassa iserterfigeriaannanngussapput, sanaartornermut ingerniøri Martin Olsen oqarpoq.
Inissiat iserterfigiuminarsakkat ukioq manna piareersimanissaat naatsorsuutigineqarpoq. Kommunip inissiaataanik Narsami, Nanortalimmi Narsarsuarmilu misissuisoqareernerani Qaqortumi inissianik nalilersuinissaq tullinnguuppoq.