Iridium telefoni qaammataasatigut attaviit atorlugit sumiikkaluaraanniluunniit attaveqaataasinnaapput. Illoqarfiit qamittoornerisa kingunerisaanni, sakkortusaaviilluunnit ajutoornerini nunaqarfinni oqarasuaatit attaveerutissagaluarpata Iridium pigineqartariaqartoq Kommune Kujallermi borgmesteri oqarpoq.
Sarfaaruttoortoqarsimatillugu, sakkortusaaviilluunniit ajutoorsimatillugit allatigulluunniit oqarasuaatit attaveeruttoorsimatillugit nunaqarfinni avammut attaveeruttoortoqartarpoq.
- Ukiuutillugu angallatit angalariaannaannginnerini ajorluinnartumik tamanna kinguneqarsinnaavoq. Napparsimasoqalertillugu, ujaasisoqartariaqalersillugu, ikuallattoqartillugu, ulorianartorsiortoqartillugu allatigulluunniit pinartoqartillugu oqarasuaatit taamaattut pissamaatitut pigineqalerput, Borgmesteri Stine Egede oqarpoq.
Misissuinerit kingunerisaannik iliuuseqartoqassasoq kommuni aaliangerpoq, tamannalu piviusunngortinneqarmat borgmesterip iluarisimaarpaa.
- Ukioq kingulleq nunaqarfittatta ilaanni attaveerunneq misigeqqipparput, tamatumalu kingunerisaanik misissuereerluta aaliangerpugut iliuuseqarfigissallugu. Qujanartumik aningaasaqarnermik ataatimiititaliap akuersineratigut tamanna massakkut piviusunngorsinnaavoq, Kommune Kujallermi Borgmesteri Stine Egede iluarisimaarinnilluni oqarpoq.