Erik Nørskovip 1949-mi inuusup marsip arfernani 2023 toqukkut qimagunnerani nunatsinni minnerunngitsumillu kujataani sunniuteqarluarsimasumik annaasaqarpugut.
Erik 19-iinnarnik ukioqarluni Danmarkimiit Nuummut nunasisoq, kingornalu Qaqortumi najugaqalertoq ukiorpaat ingerlanerini sulinermigut nuna tamakkerlugu sunniuteqarluarsimavoq.
Entreprenøritut suliffeqarfimmik ingerlatsinermini sanaartornerup silarsuaani suliaqartunut suliffissaqartitsilluarnermi sanitigut ilinniartorpassuarnut piginnaanngorsartunullu inissaqartitsiuarsimavoq. Matumanilu kujataani illoqarfinni tamani nunaqarfinnilu ineriartortitsinermut aqqutissiueqataalluarsimalluni.
Eriup ilisarnaataasa ilagaat inuiaqatigiinni oqallinnerni nipiminik ersarissumik isummersullaqqinnini, politikkikkullu malinnaanermigut isummersorsinnaanini anguniagaqallaqqinninilu, inussiarnersuunini inoqatiminullu tapersersuisartuunini.
Tamanna inuussutissarsiutilittut namminersortutut sulinermigut peqatigiiffilerinermigut kattuffilerinermigullu ersersittuartarpaa.
Erik Nørskov Sulisitsuni (GE-mi) siulersuisuunerni siulittaasuusimavoq, taamatullu aamma A/S INI-p siulersuisuunerini siulittaasuusimalluni.
Erik Qaqortumi Sulisitsisut peqatigiiffianni aamma siuttutut ingerlatseqataasimavoq, toqussilu tikillugu suleqataalluni.
Eriup inoqatiminut tapersersuisarnermi saniatigut Qaqortumi timersoqatigiiffimmut K-33-mut ukiorpassuarni aningaasaliisartutut tapersersortaasarnini ilisarnaataasa ilagaat. Timersornerup silarsuaani eqqaamaneqaatissaata ilagaat nipiminik nipikinngitsumik K-33-mut illersuisarsimanini.
Erik nunatsiniilernerminiit aamma ukiorpassuarni Qaqortumi najugaqarnermini ilisarisimannitserpassuaqarpoq, qimagunneranilu inussiarnersuunera suliniuteqartuartarneralu nunaqattaasugut maqaasissaqaarput.
Eriup toqukkut qimagunnerani qimagaasut, nulia, qitornai, ernutai, ukuai, suleqaqatai qanigisaalu qamanngavik misiginneqatigingaarpakka.
Erik Nørskovip eqqaaneqarnera ataqqinartuuli.
Kommunalbestyrelsi sinnerlugu,
Stine Egede, Borgmesteri.