Borgmesteri: Kalaallit Nunaanni katorfilinik naatitsisarneq ineriartortinneqartuarli!
Ukiuni arlaqalersuni kartofilit nunatsinni naatinneqartartut amerlasoorujussuit eqqaannarneqartarnerat allanngortittariaqartoq Kommune Kujallermi borgmesteri Stine Egede isumaqarpoq.
Katofilinik naatitsiniarluni ikkussuineq piiaanerlu piffissarujussuarmik atuiffiusarpoq, nalikitsuunanilu. Katofilit naatitat ilarparujussuisa eqqaavimmut igiinnarneqartarnerinik aallaaveqartumik naatitsisartuuginnarnissamik apeqqusiisoqartalernera Stine Egedep tupiginngilaa.
-Ajoraluaqisumik ukiuni arlaqaleqisuni nunatsinni katorfilit naatinneqartartut amerlasoorujussuit eqqarneqartarput. Tamanna pissusissamisuunngilaq, ilami sinerissami piffiit ilaanni, allaallumi maani kujataani katorfilissaaleqisoqartarpoq, naak tonserpassuit uninngasuutigineqaraluartut, Stine Egede oqarpoq.
Nunatsinni nammineq pilersornerulernermik ineriartortitsisoqassappat pissutsit taamaannerat allanngortinneqartariaqarpoq.
-Katorfilit mamarluinnartut pitsaassutsimikkullu ajukkunnanngilluinnartut pigineqarput. Ilisimatuunit paasineqarnikuuvoq nunatsinni issoq naatitsivigissallugu pitsaassutsimigut Danmarkimiit pitsaanerusoq, matumani svampeqalersitsisartunik akoqannginnerunera pillugu. Nammineq pilersornerulerniarutta sooruna nunatsinni naatitatta nutaajunerini piffinnut siammarterluarsinnaaneri taama ajornartigisoq, Stine Egede apeqqusiivoq.
Nunatsinni katorfilit naatinneqartut eqqaannarnagit atorluarneqalissappata ataqatigiissaarluakkamik aaqqiisoqartariaqarnera, Naalakkersuinikkullu suliaqartut iliuuseqarnissaannut piffissanngortoq Stine Egede isumaqarpoq.
-Ataqatigiissaarisoqartariaqarpoq. Soorlu ukiup qanoq ilinera malillugu kalaalimineerniarfinnut pisiassarsiortartugut aamma soorlu nunatsinni niuertut ilikkalerunnarsissagaluaraat augustimi nunatsinni katorfilit piiarneqartarneri taannalu aallaavigalugu atorluaallutik. Aap akisunerupput, kisianni eqqarsaatigisariaqarpoq nammineq pilersitavut pineqarnerat, Stine Egede oqarpoq nangillunilu.
-Assersuutigalugu sooq sikusartukkormiut peqqumaasivii immerluarneqarsinnaanngillat? Takusarpagummi timmisartukkut tikisitanik akikinngeqisunik pisiassaqartitaalersarput ukiullaraangat. Katorfilinik naatitsisartut upernaaq tikillugu nutaatut isikkulerlugit paarisinnaappatigit niuertut aamma taana sapertussaanngikkunaraluarpaat, taamaattumik ajornartorsiutip qaangerniarnissaanut Naalakkersuisut iliuuseqarnissaat piffissanngorpoq, Stine Egede naggasiivoq.
Udgivet d. 01. marts 2023