Kommune Kujallermi ingerlatsivinni atorfilittat ataatsimiititaliallu marluk naapinnerminni suliniutinik sulianillu pitsaasunik ingerlataqareersut, suliaat ataqatigiisaarniarlugit qanoq suleriaqqinnissartik eqqartorpaat.
- Inerisaanermut Ingerlatsivimmi uagullu ingerlatsivitsinni suliagut ataqatigiiffeqaqaat, taamaammat qanoq suleqatigiinnissarput eqqartorparput, isumaqatigiippugullu ataatsimiinnerput malitseqartissallutigu. Ukiassamut meeqqat inuusuttullu aamma ilaqutariit pillugit isumasioqatigiinnissaq siunniuffigaarput, Isumaginninnermut Pinaveersaartitsinermullu Ingerlatsivimmi pisortaq Nielsine Petersen oqarpoq.
Ingerlatsiviit naapeqatigiinnerminni ilaatigut ilaqutariinnik aqqutissiuussilluni sullissinerit aamma siusinaartumik iliuuseqarluni suliniutit eqqartorpaat. Suliassaqarfiit pillugit akimut suleqatigiilluarnikkut pilertornerusumik torersumillu pilersitsissoqassaaq.
- Inunnik isumaginninnermut pinaveersaartitsinermullu ataatsimiititaliaq Inerisaanermullu ataatsimiisitaliaq pingaarutilinnik immikkut suliassaqarput. Suleqatigiiffigisinnaasagulli aamma meeqqanut inuusuttunullu tunngapput, taamaattumik suleqatigiiffigisinnaasagut paaseqatigiinnissaq qitiutillugu, suleqatigiiffigissagigut tamani pingaarnerpaavoq Inerisaanermut Ataatsimiititaliami siulittaasoq Bibi Kielsen oqarpoq.