Tamakkuupput inuussutissarsiorneq pillugu isumasioqatigiinnermut 9. februar 2023 pisumut Borgmester Stine Egedep aggersaanerani suliffeqarfiit borgmesterimut oqaatigiumasaasa ilaat.
Saqqummiisut ilaatigut tassaapput Icelandair, Air Greenland, Milak Production (qimminut nerukkaatissiortoq), Nukissiorfiit kiisalu Innovation South Greenland.
Inuussutissarsiornikkut ineriartortitsinermi periarfissat nutaat, soorlu nutaanik tammajuitsussaliorneq, unnuiffissat amerlanerusut, neriniartarfiit amerlanerusut, kujataamiut pigisaat / tunisassiaat immikkuullarissut peqataasunittaaq tikkuarneqarput.
Peqataasut aamma isumaqarput maanna inuussutissarsiutit ineriartuleruttornerini salliutitassat pingaarnerpaat tassaassasut sulisussat nunaqavissut atorneqarnissaat, attaveqaatit pitsannerpaajunnissaannut periaasissiornissaq, aatsitassarsiornermi pinngortitap avatangiisillu mianerineqarnissaat, kiisalu aningaasalersuisussarsiortarneq ajornannginnerusoq.
Stine Egede oqarpoq:
"Mittarfissamut piareersarluta ataatsimut ilungersuutissavut pillugit inuussutissarsiortunik oqalliseqateqartarnerit ullumikkut aallarnerpavut. Inuussutissarsiutinik ingerlatallit neriorsorpakka oqaloqatigiittarnivut unittoortinnaveersaassagikka kiisalu ukiup qeqqakkaarlugu malitseqartitsilluta isumasioqatigiittarnissavut qulakkiissagikka, taamaalillutalu suliassaqarfinni eqqaaneqartuni tamani siuariartortoqarnissaa tamattaalluta aalajangiusimasinnaassagipput. Tamatumunnga qilanaarpunga”.
Qaammammi tullermi Narsarsuarmi, Narsami Nanortalimmilu isumasioqatigiinnerit ingerlanneqassapput, qaaqqusissutilu ungasinngitsukkut nassiussuunneqassallutik.