Nanortalimmi Narsamilu angutinut pikkorissaanermi ilaatigut inuttut ingerlariaqqinnissaq, akisussaaffeqarnermik ajunngitsumillu iliuuseqarnissamut alloriarnissamik aqqutissiorfissamillu imaqarpoq. Timikkut tarnikkullu persuttaasarnerup annikillisarnissaa pitsaaliuinissamullu takunnilersinnaanissaq siunertamut ilaatigut ilaapput. Angutinut pikkorissaaneq siullermik kujataani ingerlanneqartoq naammagisimaarnartoq pikkorissaasoq oqarpoq.
- Peqataasut naammagisimaaqaakka, pikkorissakkamalu naammagisimaarinninnerat tuppallernarpoq. Pikkorissarnerup naammassiartuaarnerani naliliitikkakkit, taakkulu naliliinerat malillugu tulleqaqqinnissaa assut kissaatigaat, oqariartuutigigamikku kujataani ilumut taamaattunik pikkorissaanerit ataasiaannarnatik ingerlanneqartariaqartut, Psykoterapeut aamma Soc.Pædagog Anda Poulsen oqarpoq.
Kommune Kujallermi angutinut pikkorissaaneq siullermeerluni ingerlanneqartup malitseqartitseqqinnissaannik Kommune Kujallermi Isumaginninnermut Pinaveersaartitsinermullu Ingerlatsivimmi pisortap qularinngilaa.
- Angutinut pikkorissartitsinerup peqataaffigineqarluarnera assut nuannerpoq, angutit pikkorissarsimasut oqariartuuteqarput ilisimalersimallugu tarnikkut persuttaanermi killissartik sumiittoq, ilaat oqarput, sunaaffa ilisimanngikkitsik tarnikkut persuttaasarnerminni qanoq innarliisinnaasarlutik. Angutit pikkorissarnermi peqataasut qanimut naapikkumaarpagut, tassanngaanniit alloriarnissat tullii ilusilersorumaarpavut, Isumaginninnermut Pinaveersaartitsinermullu Ingerlatsivimmi pisortaq, Nielsine Petersen oqarpoq.
Angutinut pikkorissaaneq Narsami Nanortalimmilu ingerlanneqareersoq, februaarip 15-anniit 17-at ilanngullugu Qaqortumi pissaaq.