Isumaginnittoqarfik ataatsimiititaliarlu Qaqortumi, Narsami aamma Nanortalimmi isumasioqatigiinneq:
2021 qinigaaffiup nutaap aallartinnerani, ataatsimiititaliami pingaartissimavarput politikkikkut anguniákkat annertuumik aallutissallugit. Issumasioqatigiineri pingasut ingerlallugit allartinneqarput sulisut peqatigilluinnarlugit. 2021 ukiakkut Qaqortumi ingerlanneqarpoq 2022 Narsami aamma Nanortalimmi ingerlallugu.
Isumaginninnermi pinaveersatitsinermullu ingerlatsivik aaqqissuusseqqinnermi allannguut:
Aaqqissuuseqqinnissarlu isumaginnittoqarfiup ulluinnarni innuttaasunut pitsanngortinneqarnissaa anguniarlugu ,Aaqqissuusseqqinnermi Isumaginnittoqarfiup immikkoortortaqarfiini aqutsisunik siammaanerit, kommunalbestyrelse decemberip 14-ani 2022 akuersissutigaa.
Aaqqissuusseqqinnermi Isumaginnittoqarfiup immikkoortortaqarfiini aqutsisunik siammaanerit siunniunneqarpoq, kiffartuussinermi sukkanerusumik ingerlatsineq, sullissisunut sukkanerusumik qaninnerusumillu avitseqateqarneq aaliangiinerlu anguniarlugu. Taamaasilluni Isumaginnittoqarfimmi illoqarfinni pingasuni Qaqortoq, Narsaq Nanortalimmilu immikkoortortaqarfimmi aqutsisut oqartussaaffii akisussaaffiilu siammarneqarnissaat innersuunneqarnerani akuerineqarluni.
Ingerlatsivimmi pisortaq Qaqortumiissooq, suliamik aqutsisut Qaqortumiissapput, immikkoortortaqarfinnilu aqutsisut illoqarfinni pingasuni siammarneqarnissaat akuerineqarpoq.
Kommune Kujalleq ukioq 2009-mi kommunit kattussuummata Isumaginnittoqarfimmi aqutsisutut tunngaviit, oqartussaaffiit akisussaaffiillu qitiusoqarfimmut Qaqortumut inissipput. Tamannali nalilerneqarpoq kiffartuusineq pitsaasuungitsoq, taammaammat Nalilersueqqinnermi immikkoortortaqarfinni aqutsisut tunngaviit siammarneqarnissaat akuerineqarluni.
Isumaginnittoqarfimmi aqutsisutut tunngaviit ukuupput, Ingerlatsivimmi pisortaq (Forvaltningschef), suliamik aqutsisoq (Fagchef), immikkoortortaqarfinnilu aqutsisoq (Afdelingsleder).
Allaffissornikkut pisortat Narsami Nanortalimmilu immikkoortortaqarfinni aqutsisut qanimut suleqateqatigissavaat, avitseqatigiinneq atuutsinneqalissaaq.
Isumaginninnermi pinaveersaartitsinermilu politikkikkut suliassatut pingaartillugit anguniakkat:
1. Isumaginninnermi allaffissornikkut ingerlatsinikkullu aaqqissuusseqqinneq
2. Innuttaasunik isumaginninnikkut akisussaassusilimmik inuppalaartumillu ingerlatsisoq
3. Isumaginninnermi sulisutigut naammattunik inuttaqartoq.
4. Ilaqutariinnik, meeqqanik inuusuttunik, innarluutilinnik utoqqarnillu isumassuisoq
5. Kommune meeqqanut, inuusuttuaqqanut, innarluutilinnut, tarnikkut nappaatilinnut, utoqqarnullu susassaqartut peqatigilluinnarlugit sullississaaq ineriartortitsillunilu.
6. Pinaveersaartitsineq annertooq politiit, peqqinnissaqarfik sammisarlu aallaavigalugu susassaqartut peqatigalugit pimoorullugu ingerlanneqassaaq
7. Naartuersittartut ikilisarneqarnissaat anguniarneqassaaq.
8. Kinguaassiuutitigut atornerlunneqarsimasut ikiorserneqarnissaminnut piaarnerpaamik iliuuseqarfigineqartassapput.Kinguaassiuutitigut atornerluisoqarsimaneranik paasisaqartoqartillugu / pasitsaasisimasoqartillugu piaarnerpaamik suliassamik aallartitsinissaq isumannaarneqartassaaq.
9. Meeqqat angerlarsimaffiup avataanut inissinneqannginnissaat anguniarlugu annertuumik suliaqassaagut
10. Angerlarsimaffimmi ikiortinik pikkorissaaneq.
11. Innuttaasunut tamanut inissaqartitsinikkut inissianillu sanaartornikkut siuariartorfiussaaq –Angerlarsimaffeqanngitsoqassanngilaq! Qinigaaffik naatinnagu angerlarsimaffeqanngitsunut unnuisarfinnik pilersitsissaagut
12. Tarnimikkut innarluutillit pitsaasunik tulluartunillu angerlarsimaffeqalissapput.Innarluutillit illoqarfinni nunaqarfinnilu tamani tikikkuminartunik angerlarsimaffeqarnissaat aqqutissiuutissavagut.
13. Inissiat utoqqarnut tulluarsakkat naammattut 2030 tikitsinnagu pilersaarusiorluarlugit sanaartorneqassapput, aamma nunaqarfittatsinni
14. Utoqqaat nuannaartut, pilluartut peqqissullu.
15. Inatsisit atuuttut aallaavigalugit, pisinnaatitaaffiillu innarlernagit inerisaasinnaaneq qulaajarneqassaaq, sulisussaaleqilertarneq annikinnerpaaffissaaniitilerlugu
Isumaginninnermi pinaveersatitsinermullu ingerlatsivik, sulisunik avataaniit ikiorneqarpoq.
Kommune Kujalleq-mi isumaginninnerup iluani sulisussatigut assut unamminartorsiorsimavoq, tamannalu kinguneqartitsivoq, avataaniit siunnersortaagallartut Narsami, Nanortalimmi Qaqortumilu katillugit arfineq- pingasut innuttaasunik sullissillutik ikiuupput, taamaaliornikkut Isumaginnittoqarfiup iluani suliassat atorfiit inuttaqanngikkallartut aporfiginagit ingerlaannarsinnaalerput.
Taamatuttaaq Tarnip pissusaanik ilisimasalimmik atorfiit inuttaqannginnerani avataaniit katsorsaasunik attartorluta.
Kommunalbestyrelse november qaammataani 2022 illusinissamut akuersivoq.
Siunertaralugu suliassaqarfinni suliassat naammassisinnaajumallugit Isumaginnittoqarfik siunnersortinik avataaneersunik atuinngitsoorsinnaaneq ajorpoq. Danskit kalaallillu suleqatigiinnerannut atatillugu 2023 kiisalu 2024-imi siunnersortinik atuinermut aningaasanik immikkoortitsisoqarsimavoq. Massakkut isumaginnittoqarfimmi siunnersortit avataaneersut qulit atorneqarput. Kommune isumaginnittoqarfimmi sulisussaaleqigallartillugu siunnersortit avataaneersut atorfissaqarallassapput. Utaqqiisaagallartumik inigineqarsinnaasut massakkut pigisat atorlugit siunnersortit inissinnissaat ajornakusoortarsimavoq. Taamaammat tamatumunnga taarsiullugu kommunip illusinermut aningaasanik atuinissaa aningaasanik atorluaanertut isumaqarfigineqarpoq. Illu pitsaasutut inissisimalluartutullu, taamalu sulilertussanut kajumissaataasinnaasutut nalilerneqarpoq.
Angerlarsimaffiup avataanut inissiisarneq suleqatigiilluarnikkut pinaveersaartinneqassaaq.
Meeqqat angerlarsimaffiup avataanut inissinneqannginnissaat anguniarlugu annertuumik inunnik isumaginnittoqarfimmi suliniuteqartoqalerpoq.
Kommune Kujallermi meeqqat inuusuttullu angerlarsimaffiup avataanut inissinneqartartut ukiuni kingullerni amerliartuinnavissimapput, tamannalu allanngortinniarlugu Isumaginnittoqarfiup aaqqissuussaaqqinissaanik siunertaqartumik misissuisoqarpoq.
Meeraaqqeriviit, meeqqeriviit, atuarfik, politiit, peqqinnissaqafik kiisalu inunnik isumaginnittoqarfik ukiup nutaamiit qaammammut naapisinneqartalernissaat aamma pilersaarutit ilagaat, pingaarluinnarpormi meeqqat ikiortariaqartut piaartumik ikiorserneqarnissaanik aallartitsisalernissaq.
Misissuinermi paasisat ilagaat Meeqqanut inuusuttunullu sullissinermi oqartussat aamma Ilaqutariinnut sullissiviup suleqatigiinnermikkut uangasissorujussuusinnaanerat; matumanilu suleqatigiinnerup nukittunerulernissaa siunertaralugu allannguineq pivoq.
Meeqqanut inuusuttunullu sullissinermi oqartussat aamma Ilaqutariinnut sullissivik siornatigut allaffeqatigiissimanngitsut, suleqatigiinneq nukittooq pilersinniarlugu allaffimmi ataatsimuulerput.
Meeqqanik angerlarsimaffiup avataanut inissiinissaq pinaveersaartinniarlugu suleqatigiit ataatsimuulernermikkut akunnerminni sukumiisumik ikiorsiinissamut nalilersuisalissapput,
Isumaginninnikkut inatsit tunngavigalugu angerlarsimaffiup avataanut inissiisarneq periarfissaq kingullertut periarfissaavoq; ataatsimoorlunilu ikiorsiissutissanik eqqartueqatigiittalernermi ilaqutariit avissaartinnagit sullinneqarnerisa nukittunerulernissaat siunertaavoq.
Atorfik nutaaq: Inuuniutigalugu paarsisartoq.
Kommune Kujallermi atorfik nutaaq inuttassarsiuunneqartoq tassaavoq inuuniutigalugu paarsisartuuneq, taanna qitornarsianut angajoqqaarsianut inissinneqarsimasut pillugit perorsaanikkut tapersersuisuusaaq isumassuisuussallunilu.
Inuuniutigalugu paarsisartutut atorfinittussaq meeqqat ilaqutariinni annertuummik sumiginnagaasimasut inissinneqarneranni Kommune Kujallermi Isumaginnittoqarfimmi angajoqqaarsialerisut qanimut suleqatigissavai, qitornarsiat inuunerminni atugaat ulluinnarnilu inuunerisa aaqqissugaanerusumik ingerlasarnissaannut iliuuseqaqataassalluni.
Kommune Kujallermi tamanna pisariaqartinneqarpoq, meeqqat angerlarsimaffiup avataanut inissinneqartartut kisitsitigut qaffakkaluttuinnarput, meeqqallu immikkut pisariaqartitsinerat takussaaneruleraluttuinnarluni, taamaattumik ulloq unnuarlu paaqqinnittarfimmut inissiisarneq annertusiartuinnarpoq.
Nunatta Kujataani inuusuttuaqqat pinerlunniartarnerat suleqatigiinnissamik isumaqatigiissuteqarnikkut pinaveersaartinneqassaaq
Ukiuni kingullerni nunatta kujataani pinerlunniartarneq ajoraluartumik annertusiartorpoq. Inuusuttut tillinniartarnerat, aserorterisarnerat, tillittarnerat ilaatigullu annersaasarnerat qaffakkaluttuinnarsimavoq.
Taamaattumik Kommune Kujalleq aamma Kalaallit Nunaanni Politiit ataatsimoorussaminnik suliniuteqarnermikkut pinaveersaartitsinermik ingerlataqassapput, suleqatigiinnerminnilu nunatta kujataani meeqqat inuusuttuaqqallu pinerluttarnerannik ajornartorsiuteqarnerminni imminnut pisussaaffeqatigiillutik pinaveersaartitsissapput.
Meeqqat inuusuttuaqqallu ornissinnaasaat unnuiffiusinnaasoq illoqarfinni pingasuni periarfissaassaaq, taamatuttaaq meeqqanik inuusuttunillu nakkutiginnilluni angalaarneq.
Narsami Nanortalimmilu meeqqat inuusuttuaqqallu ornissinnaasaat unnuiffiusinnaasoq misiliutitut ingerlanneqarpoq, taamatuttaaq meeqqanik inuusuttunillu nakkutiginnilluni angalaarneq .
Ornittagassamik unnuiffigisinnaasamillu ammatitsinissami siunertaavoq meeqqat inuusuttullu pisariaqartitsisut eqqissillutik unnukkut unnuamilu isersimaffissaqarnissaat, matumanilu siunnersorneqarnissamut, nerinissamut unnuinissamullu periarfissaalluni.
Utoqqaat illuani Luuvikasimmi aamma Ajarsivasimmi pulaartartunngorit ikinngutitaarlutillu
Utoqqaat inuunermi misilittagartuujupput, taamaakkamilu oqaloqatigalugit pissarsiaqarnartuaannarpoq. Utoqqaat pulaarneqartalernermikkut aliikkusersorneqarnikkullu nuannaarnermik pissarsillutillu tunniussisarumaarput.
Innuttaasunik naapisitsineq illoqarfinni pingasuni ingerlanneqarpoq, taamatuttaaq nunaqarfik Alluitsup Paa.
Illoqarfiit pingasut Narsaq, Qaqortoq aamma Nanortalik. Nunaqarfillu Alluitsup Paa. Ukioq 2023 ataatsimiititaliaq siunnerfeqarpoq, kommune kujalleq-mi nunaqarfittaanut angalanissaq.
Isumaginninnermi pinaveersatitsinermullu ingerlatsivik missingersuut.
Ukioq 2022 Isumaginninnermi pinaveersatitsinermullu ingerlatsivik missingersuut sippuinngittumik ukioq naalerpoq.
Ukioq 2023 februar qeqqaniit isumaginninnermi pitsaaliunermilu ataatsimiititaliap siulittaasua, isumaginnittoqarfimmilu pisortaq naapinneqartalernissaa aallartissaq, siullermi februar qaammtani 2023-mi. Ullulerneqarmat nalunaaruteqarumaarpugut.
Isumaginninnermi pinaveersatitsinermullu ingerlatsivik inissiat.
Nanortalimmi Ilaqutariit illuat, kommunalbestyrelse ukioq 2021 naanerani akuersissutigaa illumik pisissalluni. Tamaalilluni ilaqutariit illuat meeqqanillu sullissisut ataatsimuulerlutik.