Adventure Guidenngortut aamma Takornariartitsinermi serviceøkonominngortut Qaanaamiit Nanortalik tikillugu aggerfeqartut allagartartaarneranni, Kommune Kujallermi borgmesteri Stine Egede oqalugiartunut ilaavoq.
- Angusarsi pillugu ullumi katersuunnermi immissinnut tulluusimaarutiginissassinnut pissutissaqarluarpusi, anguniagaqarnissinnimmi pingaartitsillusi tunniussimanersi ullumi imminut akilertutullusooq takussutissillugu timitalerparsi, Stine Egede oqalugiarluni pilluaqqusinermini ilaatigut taama oqarpoq.
Allagartartaarlutik ullorsiortut siunissami takornarialerinerup silarsuaani sulilluarnissaannik oqaaseqarfigineqarput.
-Nunarsuarmi allani, nunatsinnilumi misilittakkat ilaatigut isumassarsiorfigigutsigit siunissami inuussutissarsiut una angisoorujussuanngorsinnaavoq. Ilattalu inuussutissarsiutigilluarsinnaalissavaat pimoorullugu sapiissuseqarluni ingerlakkaanni, naak ilaatigut nakkarfissat aqqusaarneqarsinnaasassagaluartut, uniffigiinnarnagit ingerlaniinnaraanni, Stine Egede oqarpoq nangillunilu.
-Ilinniakkassinnit sakkut pigilikkasi atorluarumaarpasi, ajunngitsunik tamanik kissaassillunga tamassi, angerlamut ingerlasussat ingerlalluarisi, tamassilu ilaquttasi peqatigalugit nalliuttut atorluarisigit aammalu ukiumut nutaamut iserluarisi.