Qaqortumi, Narsami Nanortalimmilu innuttaasunik ataatsimiisitsisoqareersoq Kommune Kujallermi Inerisaanermut Ingerlatsivik iliuusissanik pilersaarusiornissamut piareersaleruttorpoq.
- Meerartatta pitsaanerusumik atugaqarnissaat anguniartuarparput, illoqarfiit pingasut isumasioreerlugit sakkussanik pissarsiatsinnik nukittunerulluta suliarput nangissinnaanngorparput, tassami atuisutta isumaat qanimut tusarlugit suleriaqqinnissatsinnut isumalerujussuupput, Meeqqeriveqarnermut Siunnersorti Malene Høegh-Olsen oqarpoq.
Meerartagut pillugit pilersaarusiorluakkamik allagaateqalernissaq Inerisaanermut Ingerlatsiviup pingaartippaa.
-Illoqarfinni pingasuni angalanitsinni innuttaasunik peqataalluartoqarnera nuannaarutigaarput, maanna innuttaasunit pissarsiagut misissussavagut ingerlariaqqinnissarlu ilusilersorlugu. Ilusilersugassatta ilagaat atuarfiit meeqqeriviillu peqataatinnissaannut ilusilersuineq, taakkunani ukkatarissavarput meeqqerivinni atuarfinnilu pilersaarummut kissaataat katersussallugit. Ingerlariaqqinnissatsinnut qilanaarpugut, Atuarfeqarnermut Siunnersorti Avijâja Simonsen oqarpoq.