Juulli puigunaatsoq:
Ippimmi meeraavunga uunnartup kangerluani, illorput anginngitsunnguuvoq ujaqqanik sanaaq iluali qisuulluni.
Juullilernerani 23-ani innajaartarpunga, ataatsimik eqqaammavara sinilinngikkuma juulimaaq isernavianngimmat sininniapallallunga sininnerlu sapilerlunga.
Angajoqqaaka pinnersaasut tusaasinnaavakka, soorlu aviisilersorpalaaq, ungasillerpalukkaangata isikka ammalaarlugit masertarpakka. Taamanikkut sininneq ajuliinarama angajoqqaama nipaallisaatinik iisitippaanga sinilerniassagama.
Meerartaaramalu meeqqakka 23-ani pinnersaaqatigisarpakka sininneq ajulerluni nuannerpallaarneq ajormat.
Puiguikkiussamma ilaat unaavoq 5-6-it missanik ukioqalarlunga ullaakkut anaanap nammineq kjoliliarisaminik atitikkaanga nujakkalu perlaarlugit. Ajakkunnullu takutikkiartussallunga anigama, pinngortitaq isigisara alutoringaarakku unillunga isiginnaaqaarpara.
Uunnartup kangerlua tamaavimmi qatsorsimagami, seqineq qaqqap qooruatigut nuilluni timmissallu assigiinngitsut qarlorpalaartut tusaasinnaallugit. Isigisara kusanangaarmat meeraagaluarlunga attortiffigaara, tamaanilu unillunga pinngortitaq isiginnaaqaarpara.
Mariep siunnersuutitsialaat tunniukkusutai:
● Utoqqaasugut pissuserput juulleriartornerani ataqqisiuk, juulli meeqqanut ataqqinartuutissiuk.
● Meerartasi juulleriartornerani misigisassinnik oqaluttuarfigisarsigit.
● Meeqqanut juulleriartornerani tussiaqattaarneq ingerlatseqqissiuk soorlu oqaluffimmi, utoqqaat illuini, atuarfinni allanilu, tussiarneq tipaatsunnartuummat.