Juullisiorneq puigunaatsoq: Meeraaninni juullisiortarnerit nuannersut puiunaatsullu amerlaqaat. Qujamasuttaqaanga angajoqqaakka mikisuuninni marluujunnaarnikuugaluarlutik, suli tamattaalluta nuannisarluta ataatsimoorluta juullisioqatigiissinnaasarsimagatta.
Juulleriartornerani misigissuseq eqqarsaatigissagaani eqqaamasakka Ningiooqqannut tuttuaannarput. Uummagallarmat juullikkunni persuarsiorujussuartarami. Ini tamaat juullerpalaartunik pinnersarlugu, qilaaq iigarlu tamaat qiortakkanik nissiaralersorlugit siaartartulersorlugit, orpillu pinnersarluarlugu qorsuttaa ersiunnaarsillugu. Meeqqat tamarmik poortugarsiassaannik pikilluni, orpiullu naqqa poortukkanik ulikkaarlugu. Uagut meeqqat pilerisangaaratta poortukkat marseqattaartarpagut sorliit kimukarnersut, anginerillu kiap pissarinerai.
Eqqaamasarpara ini kialaartoq, asanninnermik ulikkaartoq, toqqissisimanartoq, juullisunnittoq kaageeqqat nerisassallu tipaat. Unnukkut nereqatigiittarpugut qaalivinnissatta tungaanut, apparsalaariarluta orpiliartarpugut erinarsoqattaarluta. Ningiooqqama assut pingaartittaramiuk tussiutit juullisiutit atornissai. Naggataatigut poortukkanik ammartiterisarpugut, kingornalu eqqissisimaaqatigiittarpugut tussiutit tusarnaarlugit, pinnguartaagullu pinnguarerujuutigalugit.
Juulli uannut puigunaatsoq tassaavoq ataatsimoortarnigut, ningiooqqap persuarsiorujussuartarnera qanilaarnerlu. Tassa uannut juulli nuannernerpaaq puigunngisaannagassara.
Miap siunnersuutitsialaat tunniukkusutai:
•Inuuneq ataasiinaavoq, nuannersunik immersorniartsigu.
•Illit nammineq pineqarusunnertulli inoqatitit pissusilersorfigisakkit.
•Julli tassaanngilaq poortukkanik akisuunik pissarsinissaq, asasit asasat pilluarnartumik ilaginissaat pingaarnerpaavoq taanna nammineq tunissutaavoq naliitsoq.