Juullisiorneq puigunaatsoq: Meeraallunga juulli nuannernerit ilagivaat Qaanaami kammalaatikka ilagalugit silatangiaasarnerput. Juulleriartornerani tussiutini juullisiutit atuarfimmi ilinniartaratsigit, taavalu atuareeraangatta silatangiaaqatigisattagassakkalu aamma ilinniarlugit tussiaqattaartarluta. Taamaasilluta juulliaqqami uagutsinni orpiliareeraangatta silatangiaaneq aallartittarparput. Ilaatigut naneruarfilerluta, tussiutit tigullugit illumiit illumut silatangiaasarpugut.
Taamanikkut pinnatassat pingarnerpaaneq ajorput, iserfitsinni juullimi pilluaqqusinissaq pingaarnerpaasarluni.
Ila juulliaraq nuannertassusia silatangiaareerluni angerlarluni nuannaarluni illup ilua juullerpalaarluni, inersimasut silatangiaarpalullutik aallartittut tusarnaarlugit sinileriartuaarluni.
Bolethep siunnersuutitsialaat tunniukkusutai:
•Meerartasi peqatigalugit juullisiutinik erinarsoqatigisarsigit, imaasinnaavoq silatangiaaneq kajumigilerumaaraat.
•Utoqqartasi ilagalugit kaageeralioqatigisigit, ataatsimoorneq nuannersuummat.
•Juullip qaammataani minnerpaamik ataatsimik inoqatinnut ajunngitsuliorit.