Juullisiorneq puigunaatsoq
Meeraallunga juullimi ullaakkut itertarneq puigunaatseqaara. Illunnguarput kialaartoq, juullimi pisatsersorluarsimasoq, orpiliaarannguaq kakillarnanik sanaaq pinnersarluarsimalluni naneruuteeranngui ikumasut, qinngornermik pinningaartumik kissalaamillu tunisisut.
Illup qeqqani nerrivimmi naneruuteeqanik sisamanik naneruutitalik kissatsikkaangami kaavittua kaavilersartoq, sianaarpalaalerlunilu, qaavanillutik inngileeqqat kaaveqataasut.
Radiomi juullisiutinik tussiartut tusarnaarlugit iterfik naleqanngittoq eqqaammasarpara.
Nalunagu ullukkut nerilluartussaalluni, meeraanitsinni siatartorneq aatsaat persuarsiorfinni pisarmat. Unnukkut orpiliareernermi tunissutisisussaaluni. Atualereerattalu naalagiarnermi pivorleertarnigut eqqaammasarpara aallaqqaammut pissanganartarnikooqisoq.
Juullikkunni ualikkut naalagianeq naaleraangat ittu oqaluffimmiit aniaalaarluni illunnguatta oqaluffiup akinnguaniittup igalaavini marluusuni naneruuteeqqat arfineq marlukkaarlugit ikissimasarpai, oqaluffimmit anilluni pinningaartaqisut. Taamani innaallagiaqannginnatta qaamanerit assorsuaq kusanartarput. Igalikumi meeraasimasut tamarmik eqqaamassavaat.
Stinep siunnersuutitsialaat tunniukkusutai:
- Meeqqavut paarilluartigit, peroqqullugit nammineersinaallutik namminerlu pilersorsinnaasuullutik.
- Inoqatinnut unneqqarissuugit, minnerunngitsumik imminut unneqqariffigigit, taamaallutit angusassat annerungaassaaq.
- Inuunitsinni aqqutivut artornarsinnaasarmata, ilaatigut kisimiilluta ilaajarsinnaanngisavut. Amerliartortinnaveersaakkit ikiortissarsiornissallu tunuarsimaarfigisaqinagu. Ersinngitsumik artorsaateqarluni timimut tarnimullu peqqinnanngilaq. Ilavut pissusilersuutimikkut ikiortariaqarnerminnik malugeqqusut, meeraappata inersimasuugaluarpataluunniit, iliuuseqarfigisarniartigit kingusinaartigata.