Juullisiorneq puigunaatsoq: Meeraaninni juullisiortarninni nuannersut eqqaamasat, ullaakkut iteraanni ini juullerpalaalersimasoq, anaanaga itereerluni naneruutinik ikititersimalluni kaffisunnialaaq, ullaakkorsiutit piareersarujoorai. Ullaakkorsiunnginntsinni orpimmiittut naneruutit ikititseriarlugit ilaqutariiulluta (anaanaga ataataga qatanngutikkalu) ullaakkorsiortarpugut.
Juulliaqqamilu ileqqoraarput ullaakkut unnukkullu orpiliarneq, ammaasarlutalu, affai ullaakkut affai unnukkut.
Ilitsoqqussarivarput juulliaqqami uaguttaannaalluta juulliararsioqatigiinneq, 25-anni ilaquttagullu nereqatigiinneq, 26-annilu angajoqqaamma kammalaataalu juullisiorneq.
Juullikkunni meeraalluni tipaatsunnerinnavik, meeqqat juulliat ullaamiit unnummut misigitinneqangaatsiartarpoq. Unnukkut meerarpassuulluta silatangiaanerit ingerlattarpagut.
17-nik ukioqarlunga Syd Amerikami ukiininni juullisiornera allaanerulluinnartoq misigivara, juulli kialaarsuaq aasarissuaq. Juullip ullaavani niiverniarneq, seqinnisaarneq, unnukkullu ilaqutarsiakkalu silatitsinni nereqatigiinneq poortukkanillu tunioraalluta. Unnuap qeqqanngilaataalu assut qummoroortarrapput. Juulli angajoqqaakka qimallugit siulleq taamannak misigivara, misigisaq allaanerulluinnartoq, decemberip aallaqqaataani orpik illup iluani nappareertarpaat sapaassuillu maliginngilakka, taamanili oqartarpunga kalaallit nunaanni uannut juulli tipaatsunnartuuvoq ilaquttat ikinngutit juullisioqatigalugit.
Arnajaqqap siunnersuutitsialaat tunniukkusutai:
• Poortukkanik tunisinngikkaluarluni, qanilaarneq ikioqatigiinneq poortukkaniit tunisinerusarpoq.
• Nammineq iliuseqarit, allat utaqqinngikkaluarlugit.
• Nuannaarneq, erinisunneq, qilanaarneq, tipaatsunneq taakkuupput juullimi misigalugit nuannersut, sanilinnut nuannarisannut misigitittakkit.