Juullisiorneq puigunaatsoq:
Juullit puigunaatsorpassuit nuanningaartullu ilaat immikkut eqqaamasara;
Meeraalluta pissarissaarnerpaanut ilaanngilagut anaanamali asanninnerujussuarmik toqqissisimanermillu kisermaalluni pisinnaasannguani tamaat perorsarpaatigut. Juulli qalliartortillugu ulapaartarpoq mersuussilluni unnukkullu tussiaqattaartartut sungiusaqatigisarlugit.
Illunnguatsinni ataasiinarmik initalimmi nukaralu quleriinni siniffeqaratta saagorsinnaasut - Juulliaqqallu unnukkuutissaani anaanaga pinnersaasoq saagut illuartilaannguarlugit takusoorsinnaasarlugu. Siaartartut pappilissat naneruarfiit iikkanilu nissimaap assinga plakati nivinngartarpai igalaallu saavani naneruuteeralersortarluni.
Juulliaqqami ullaakkut ammaatinneqartarpugut ullumikkutuut unnukkut orpiliaqatigiinnermi pinnata. Nammineq mersukkaminik kjolinik kaminnillu nukaralu assigiinik nuersakkaminillu kavaajaasanik nasanillu tunisarpaatigut juullikkunni naalagianilu atugassatsinnik.
Juulliaqqat ilaanni qilanaakkusserpasilluni kumoorpaatigut tunniussassaqarnerarluni. Anillakkami eqqutileriallarai qamutit nukaralu marluulluta angajutsinnit pajugutisiarisimasagut. Taamani misigisaq puigunaallunilu tupinnaq qanorlimi nukaralu isigaluta qamutinik sisorartugut tulluussimaartigaa.
Tamassi juullimik pilluarnartumik kissaallusi pilluaqqungaarpassi.
Pitsip siunnersuutitsialaat tunniukkusutai:
● Sumiluunniit Juulli ataasiuvoq - inuunitsinni sumiffigut ilaanni allanngortittariaqartarpagut assigiinngitsunik peqquteqarluta. Annaasisittali inunngornera nalliussillugu tipaatsuut pigigaanni Juullip tipaatsunnartua sumi tamani misigisiguttoq tamatta.
●Atukkat artornaraluarpataluunniit pilluaatitit qalliutinniartuakkit. Taarsiornitsinni qulliit nillertuusinnaapput aliasuummik kamammillu akullit - eqqaasartiguli aamma qulliit oqiliallannartut kuutissinnaagatsigit.
●Asanninneq qujamasunneq isumakkeerfiginninnerlu pigigukkit inuunermilu tateqarlutit inuuguit atukkat suugaluartut tamarmik oqinnerusutut ittarput. Inoqatinnguagut sanngiitsut alianartumillu eqqugaanikut qanilaarnikkut oqilisaasseqatigikkit meeqqallu pissakilliortut sipporussannik takusassilaartarigit.