Kujataani siunnersuisoqatigiit ataatsimiinnerani siullermi oktobarip 31-anni isumaqatiissutigineqarpoq pinaveersaartitsinermik aallaaveqartumik unnukkut meeqqanut inuusuttunullu nakkutilliisoqartalissasoq. Taamatumalu saniatigut meeqqat inuusuttullu ornittagassaannik unnuiffigineqarsinnaasumik ammatitsisoqarluni misiliisoqassasoq.
-Illoqarfimmi meeqqanik inuusuttunillu nakkutiginnilluni angalaarneq siullermeerluta novembarip sisamaanni ingerlatissavarput, taamatullu aamma Ilaqutariinnut sullissivimmi ornittagassamik unnuiffigineqarsinnaasumillu ammatitsissalluta; ornittagassami unnuiffigineqarsinnaasumi sulisut marluussapput, unnuamilu eqqumaannarlutik meeqqanik inuusuttunillu nakkutiginnissalutik, Inunnik isumaginninnermut ingerlatsivimmi pisortaq Nielsine Petersen nassuiaavoq.
Ornittagassamik unnuiffigisinnaasamillu ammatitsinissami siunertaavoq meeqqat inuusuttullu pisariaqartitsisut eqqissillutik unnukkut unnuamilu isersimaffissaqarnissaat, matumanilu siunnersorneqarnissamut, nerinissamut unnuinissamullu periarfissaqassaaq.
Novembarip sisamaanni illoqarfimmi angalaarluni nakkutiginninneq nalunaaqutaq 21.00-miit unnuap qeqqata tungaanut ingerlanneqassaaq, Ilaqutariinnullu sullissivimmi Kirkegårdsvej B 809-miittumi isersimasinnaaneq unnuisinnaanerlu novembarip sisamaanni nalunaaqutaq 21.00-miit sapaammi nalunaaqutaq 10.00 tungaanut periarfissaassaq.