Kommune Kujallermi ingerlatsivinni pisortat, suliassaqarfinni pisortat aamma immikkoortortaqarfinni aqutsisut marlunngornermi novembarip arfineq-pingajuanni Qaqortumi ataatsimoortinneqarlutik isumasioqatigiisinneqarput. Isumasioqatigiinnermi pisortat aqutsisullu akisussaaffii aamma ataatsimoorussamik naleqartitat oqaluuserineqartut ilagaat.
-Pingaaruteqartorujussuuvoq pisortat aqutsisullu suliassaqarfimminni akisussaaffiit ilisimaarilluarnissaat, taamaattumik taamatut ataatsimoortitsinermi akisussaaffiit pillugit eqqartueqatigiittoqarpoq, tamanna aqutsisut ataatsimut siunertaqarlutik ineriartortitsinissaannut minnerunngitsumillu kommunitsinni sullissinerup pitsanngoriaqqinnissaanik nassataqassasoq qularinngilara, Kommune Kujallermi pisortaaneq Tine Pars oqarpoq.
Kommune Kujallermi pisortat immikkoortortaqarfinnilu aqutsisut Nanortalimmiit,Narsamiit kiisalu Qaqortumiit isumasioqatigiinnermi peqataasut 30-t sinneqarput.
-Suliffeqarfimmi ataatsimi anguniakkanut ataatsimoorluta akisussaaqatigiippugut, taamatullu ataatsimoorluni eqqartueqatigiinneq aamma naleqartitanik eqqartueqatigiiffiummat isumasioqatigiinneq pissarsiffiulluarluni ingerlanneqarpoq, isumasioqatigiinnitsinnilu naleqartitanik pilersitsinissaq siunertaralugu eqimattamik suligasuartussamik pilersitsisoqarpoq, Tine Pars isumasioqatigiinnermik iluarisimaarinnilluni oqarpoq.
Pisortat aqutsisullu isumasioqatigiinneranni naleqartitanik pilersitsisoqartussanngorpoq
Kommune Kujallermi pisortat aqutsisullu ataatsimoortillugit akisussaaffit aamma ataatsimoorussamik naleqartitat pillugit isumasioqatigiittoqarnera sullissinermut pitsanngorsaataassaaq.
Udgivet d. 10. november 2022