Nanortalimmi inuusuttut akornanni serlersaarisarneq akiorniarlugu inuusuttut ornittagaanni Alummiuni suliffeqarfinniit assigiinngitsunit pulaartoqarluni paasititsiniaasoqartarnera ingerlanneqartalernikuuvoq, sapaatillu akunnera kingulleq qatserisartut pulaartorineqarput.
-Siusinnerusukkut Nanortalimmi politiit, inunnik isumaginnittoqarfimmi sulisut, peqqinnissaqarfillu pulaartoralugit inuusuttunut paasititsiniaalluni qaammarsaanerit ingerlanneqarnikuupput. Sapaatillu akunnera kingulleq qatserisartut pulaartorinerat inuusuttunik peqataaffigineqarluarluni iluatsilluarpoq, Panissaaq Poulsen Alummiuni aqutsisoq oqarpoq.
Suliffeqarfiit pulaartartut Alummiuni aqutsisuusup Panissaaq Poulsenip isumassarsiorneratigut aaqqissuussaapput, qaammatikkaartumillu pulaartoqartarnermi kikkut pulaarsinnaanerinik klubrådit siunnersuuteqartalersimapput.
-Taamatut pulaartoqartarneq inuusuttunik nuannarineqarluarluni tigulluarneqartarpoq, maannalu klubrådit peqatigalugit suliffeqarfinnik pulaarsinnaasunik eqqartuisarpugut. Maanna pilersaarutit malillugit pulaartussaq tullinnguuttoq Nalunaminngaanneersuuvoq Sirius-patruljimi sulisimasoq, Panissaaq Poulsen oqarpoq.
Januarimi pilersaarutaavoq Majoriamiit Alummiunut pulaartoqarnissaa, matumani inuusttut meeqqat atuarfianiit naammassereernermi ingerlariaqqiffissat assigiinngitsut saqqummiunneqarnissaat siunertarineqarluni.