Ilisarnaatissatut ajugaatinneqartumi takuneqarsinnaavoq seqernup nunarsuaq pakkusimagaa, assilissami seqernup nunarsuullu ataqatigiinnerat isumaavoq, soorlu inuit imminnut susassareqatigiinnerat taamaattoq.
Ilinniartitaanermut aqutsisoqarfiup unammisitsinnerani siunnersuutit 100-t sinneqartut tiguneqarsimasut akornanni Nanortallip Atuarfiani 7.a-mi atuartut ajugaatinneqarput, ajugaatinneqarnerat Kommune Kujallermi borgmesterip Stine Egedep nuannaarutigaa.
- Kommunitsinni atuarfitta taamatut saqqummertarnerat tulluusimaarutigisarpara, soorlu aamma ukioq kingulleq Qaqortumi Tasersuup Atuarfiani timimik aalatitsilluni atuartitsisoqartarnera akissarsissutigineqartoq. Nuannaarutigaara maanna Nanortallip Atuarfiani atuartut unammisitsinermi ajugaatinneqarnerat, ajugaatinneqarnerannilu pilluaqqungaarpakka, Stine Egede tulluusimaarluni oqarpoq.
Nanortallip Atuarfiani 7.a-t ilisarnaatissamik unammisitsinermi ajugaanerminni akissarsiaq anneq tassa 10.000 koruuninik aningaasartalik pissarsiaraat.
Ilisarnaatitut ajugaatinneqartoq aamma ajugaatinneqartup aappaa pingajuallu nuna tamakkerlugu pimmatiginnittaneq akiorniarlugu periusissiamik atuutsitsilernissami, nittartakkani, inuillu internitsikkut ataatsimoorfiini atorneqartassapput.