Najukkami siunnersuisoqatigiit Politinit kommunimillu suleqatigiiffiuvoq, kommunimi pinerluttuliortarnerit annikillisarniarlugillu pinaveersaarniarlugit siunertaqarfiusoq. Kommune Kujallermi najukkami siunnersuisoqatigiit kommunimi meeqqat inuusuttullu aserorterisarnerat tillinniartarnerallu annikillisarniarlugit suliniuteqarfigaat.
Oktobarip 31-anni 2022 ataatsimiinnermi siullermi isumaqatigiissutigineqarpoq tamakkiisumik meeqqanut inuusuttunullu tunngatillugu pinaveersaartitsiniarluni suliaqarneq ingerlatiinnarneqassasoq, aammalu unnukkut meeqqat inuusuttullu akornanni annertusisamik ornigulluni suliniuteqarneq aallartissasoq.
Najukkami siunnersuisoqatigiit siulittaasuat, Politikommissæri Søren Hansen oqarpoq: "Najukkami siunnersuisoqatigiinni siullermeerluta ataatsimiinnitsinni pingaaruteqarpoq pinaveersaartitsilluni sulianut attuumassuteqartut tamaasa ilanngussussallugit, taamaaliornikkut pinaveersaartitsinermi paasisimasat misilittakkallu pisariaqartut qulakkeerneqassammata. Tamanna anguniarlugu piaartumik ataatsimiigiaqqusissaagut, neriulluta paarsivinni aqutsisut, peqatigiiffiit, perorsaasut il. il. meeqqat inuusuttullu akornanni pinerlunnerit annertusiartuinnarnerat ajunnginnerusumut saatsinniarnissaannut isumassarsiaqarlutik suliniuteqaqataasinnaassasut."
Unnukkut ornigulluni suliniuteqarneq piffissami qaninnerpaami aallartisarneqassaaq, tamanna Isumaginnittoqarfimmit ingerlanneqassaaq.
Kommune Kujallermi najukkami siunnersuisoqatigiinni tassaapput politikommissæri Søren Hansen (siulittaasoq), kommunimi pisortaaneq Tine Pars, isumaginnittoqarfimmi pisortaq Nielsine Petersen kiisalu atuarfeqarnermut, meeqqeriveqarnermut suliffeqarnermullu ingerlatsivimmi pisortaq Jesper Ryttov. Tamatuma saniatigut Narsamiit Nanortalimmiillu allaffissornikkut pisortat Ulla Rafaelsen aamma Ado Silassen siulersuisoqatigiinni aamma ilaasortaapput.