Isertitassat 662 mio. kr-inut, kiisalu ingerlatsinermut sanaartornermullu aningaasartuutissat 645,2 mio. kr-inut kommunip missingersuusiorpai, taakkunanngalu sanaartornermut missingersuutit 31,8 mio. kr.-iupput. Taamaalilluni 2023-imi sinneqartoorutissat 15,8 mio kr.-inut missingersuusiorneqarput.
Ukioq manna missingersuutini taamaallaat 7,156 mio. kr.-it ataatsimiititaliat kissaataannut atugassanngortinneqarput. Tamanna pissutigalugu kommunalbestyrelsi ilinniartitsisunik isumaginninnermi siunnersortinik atorfinitsitsisoqarpat akissarsiassaannnut, qarasaasiatigut isumannaallisaanermut kiisalu qatserisartutut ilinniartitsinermut sillimmatissanik immikkoorsitsiniarluni aalajangerpoq.
Borgmesteri Stine Egede ima oqarpoq:
”Ukioq manna missingersuusiornitsinni Inatsisartut missingersuutinut killiisimanerat ilungersunartorsiutigaarput. Ataatsimiititaliat 80 mio. kr.-it tikillugit kissaateqarsimapput, taamaammallu uggornanngitsuunngilaq 2023-mut ataatsimiititaliat kissaaterpassui piviusunngortinneqarsinnaanngimmata."
Kommunimi ineriartornerup aningaasarissaarnerulernissallu kommunalbestyrelsimit qanoq qularnaarneqarsinnaanerannik nassuiaaqqusilluni Aningaasaqarnermut Naalakkersuisumut kommunalbestyrelsi allagaqaateqarpoq, pingaartumik Qaqortumi mittarfissap malitsigisaanik inuussutissarsiornikkut ineriartortitsisoqarnissaa eqqarsaatigalugu, kiisalu inersimasut aammalu meeqqat inuusuttuaqqallu eqqarsaatigalugit pinaveersaartitsisoqarnissaa suliassani salliutinneqarpoq, tamatumanilu ilaqutariinnut kommunimullu atugassarititaasut tigussaasut pitsaasut pisariaqartinneqarput.
Stine Egede ataatsimiinermi ataatsimiititaliat sulinerannut qujassuteqarpoq kiisalu kommunalbestyrelsip tamarmiusup 2023-mut missingersuutinik akuersinera nuannaarutigalugu oqaatigalugu.
"Aqutsisutut atorfiit tamarmik maanna inuttalerneqarsimalernerat kiisalu aaqqissugaanitsinnik allannguinerput kommunitta pitsaasumik ineriartornissaa anguniarlugu sulinitsinnut iluaqutaalluarput. Inuusuttut qassiit ilinniagaqareerlutik Kujataanut uterniarlutik aalajangernerat takullugu nuannerpoq. Maanna isumaginninnermi siunnersortitut ilinniartitsisutullu atorfiit amerlanerusut inuttalerneqarnissaat ilungersuuttussanngorparput. ”Ilinniarsimasunik sulisoqalernitsigut inuttut ajornartorsiutit kingornuttaqattaakkat ilorraap tungaanut saatsinneqarnissaat neriuutigilluinnarparput, Stine Egede naggasiivoq.
Kommunalbestyrelsi ataatsimiinnermini aalajangerpoq kommunip inuussutissarsiutinik ineriartortitseqatigiiffiutaanut, Innovation South Greenlandimut, kiffartuunneqarnissamik isumaqatigiissut ukiumut marlunnut atuuttussanngorlugu isumaqatigiissutigineqassasoq. Taamaalilluni sulianik pilersaarusiortarneq kiisalu Ingerlatseqatigiiffiup sulisoqanrera ataqatigiinnerusumik ingerlanneqarsinnaalissaaq.
INI A/S-i aqqutigalugu inissianik attartornermut aningaasaliissutinit pissarsiat INI-mut utertinneqassasut Kommunalbestyrelsip siusinnerusukkut aalajangereerpaa, matumani aningaasat inissianik aserfallatsaalinermut nutarterinermullu atorneqarsinnaniassammata. Missingersuutit akuersissutigineqarnerisigut tamanna 2023-mi piviusunngussaaq.