Qaqortumi meeqqanut inuusuttunullu isersimaarfiusinnaallunilu unnuiffiusinnaasoq tallimanngornermi novembarip sisamaanni kirkegårdsvej B-908-mi siullermeerluni ammatinneqassaaq.
-Siullermeerluni ammatitsinissamut atatillugu nuannaarutigalugu qujamasullungalu Isumaginninnermut Ataatsimiititaliaq suliaanut qujaffigerusuppara. Ukiorpassuarnimi eqqartorneqartareersoq kiisami piviusunngulerpoq, Stine Egede qujamasulluni oqarpoq.
Meeqqat inuusuttullu unnuami ornitassaqaratik pinerlunniartarnerannut taama periarfissiisoqarnera pinaveersaartitseqataassasoq borgmesteri isumaqarpoq.
-Soorunami angajoqqaat tamatta tassaavugut meeqqatsinnut akisussaasuusut. Ajoraluartumilli ilaqarpugut assigiinngitsutigut pissuteqarlutik nukissaqanngitsut, meeqqaminnillu sumiginnaalersimasut. Tamaattumik periarfissaq meeqqanut unnuami assigiinngitsutigut tujormillutik ornigassaqaratik illoqarfitsinni angalaartartunut, allaallumi pinerlunniarnermut sangusartunut pinaveersaartitsinermut aallaaviussaaq, Stine Egede oqarpoq nangillunilu.
-Aserorterinerit, tillinniarnerit, annersaanerit, naamaarniarnerit, atornerluisunngornissamulluunniit ussernartorsiortitaanerit killilersimaarneqalissapput. Allaallumi nakkutigineqanngiffimmi tukkuffigisariaqakkamiinnermi kinguaassiuutitigut kanngutsaatsuliorfigineqarnerit, atornerlugaanerilluunniit pinngitsoortinneqarsinnaalissapput, Stine Egede oqarpoq.
Isumaginnittoqarfimmi sulisooreersut atorlugit meeqqat inuusuttullu ornitagassaanni unnuiffiusinnaasumi meeqqanik nakkutiginnittoqassaaq.
-Sulisut siunnersuisinnaassapput marluusarnissaallu qulakkeeriigaavoq, angerlarsimaffimmi aammalu ilaqutariit ikiorserneqartariaqarnerannik apuussinissaminnut pisussaaffeqartut. Tassami sulisussat tassaapput isumaginnittoqarfimmi sulisooreersut. Suliniut pilersinneqarpoq, angajoqqaat pisinnaannginnerini pisortat meeqqat illersorniarlugit qisuariartussaaneri pissutigerpiarlugu, Stine Egede oqarpoq.
Siunissami aggersumi Nanortalimmi Narsarmilu meeqqat inuusuttullu ornittagassaannik unnuiffiusinnaasunik pilersitsisoqarnissaa siunertaavoq.