Stine Egedep Nanortalimmi innuttaasunut ilaatigut oqaatigaa Nanortalimmi maanna aqquserngit asfalterneqarneri naammassisimasut, kommunilu inissiarsuarmik ammaanissamut pilersaaruteqartoq
tarnikkut innarluutillit atugarissaarnerulernissaat siunertaralugu, kiisalu errorsisarfimmik sivisuumik kissaatigineqarsimasumik ammaasoqassasoq.
Innuttaasut Nanortalimmi apeqqarissaarput, ilaatigut apeqqutigaat inissiat imaqanngitsut qanoq pilersaarfigineqarnersut, utoqqarnut inuusuttunullu inissianut tunngasut, meeqqanik angerlarsimaffiup avataanut inissiisarnerit pillugit, kiisalu suliaqartitsiniarneq annertusarniarlugu suliniutit pillugit apeqqutigineqarlutik.
-Kommunalbestyrelsip tulliani ataatsimiinnerani Narsami inissiat/illut imaqanngitsut sorliit tuniniarneqassanut aalajangerneqassaaq. Suliami matumani kommunip inissiaatai tamarmik misissorneqassapput takuniarlugu sorliit tuniniarneqarsinnaanersut, nutarterneqarsinaanersut isateriaannaanersullu paasiniarlugu. Illut Nanortalimmiittut tullinnguupput, aamma utoqqaat inissiaannik naammattunik peqarnissarput suli qitiutissavarput, Stine Egede oqarpoq nangillunilu.
-Innuttaasut amerlanerusut sulilissappata pisariaqarpoq Majoriap inuussutissarsiuteqartullu akornanni suli aaqqissugaanerusumik aammalu annertunersumik suleqatigiinnissaq. Kommunitsinni suleqatigiinnerup qanoq ingerlanera paasiniarlugu nalilersuisoqarnissaa kissaatiginarpoq, taamaasilluta kommunitsinni suliffissaaleqisut ikilisinnissaat sukumiinerusumik sulissutigisinnaassagatsigu.
Alluitsup Paani aqqusinernut iluarsartuussinissamut, angerlarsimaffinni ikiorteqarnerulernissamut, qimminut angalaannartunut, illorpassuarnut imaqanngitsunut, kiisalu ikiaroornartup ajornartorsiutaaneranut tunngasunik innuttaasut apeqquteqarput.
Alluitsup Paa nunaqarfiuvoq innuttaasutigut annertuumik ikiliartorfiusoq. Innuttaasut 167-it nunaqarfimmi najugaqartutut nalunaarsorsimapput, taakkunani atuarfissuarmi nutaaliami taamaallaat 10-12-it atuartuupput, meeqqallu sisamat meeqqerivimmiillutik.
-Ikiaroornartumik ajornartorsiuteqarneq annermik sumi tamaani ajornartorsiutaavoq, tamannalu naammattumik iliuuseqarfigiuminaappoq. Taamaakkaluartoq kinguaariit nutaat atornerluiffiusumik inuuneqarnissaat kiisalu allatigut inuunerlunnissaat pinaveersaarniarlugu iliuuseqartariaqarpugut. Siusinaarluni iliuuseqarnissaq pingaaruteqarpoq, kommunimiillu peqqinnerusumik inuuneqarnissaq siunertaralugu innuttaasunik suleqateqarnissamut pikkorinnerusariaqarpugut piareersimanerusariaqarlutalu, Stine Egede oqarpoq.
Nanortalimmi Alluitsup Paanilu innuttaasunik ataatsimiititsinerup saniatigut Aappilattoq Narsarmiillu tikeraarneqarput. Borgmesterip aasaq Aappilattumut tikinniarnera sila peqqutigalugu iluatsinngimmat kingusinaalaartumik Aappilattup 100-liineranut atatillugu ataatsimut ullup qeqqasioqatigiinneq ingerlanneqarpoq. Narsarmiini kommunip Tusassimit illusiarisimasai tallimat misissorneqarput. Illu ataaseq atuarfittaatut atorneqarpoq, illullu sinneri qanoq atorluarsinnaanerinik ingerlatsiviit nunaqarfiillu siulersuisut akornanni pilersaarusiorneqassaaq.