Kommune Kujallermi atuarfeqarnermut meeqqeriveqarnermullu immikkoortortaqarfik, Kommune Kujallermi meerartavut meeqqerivinni atuarfinnilu siunissaanut pilersaarusiornissami angajoqqaanut innuttaasunullu Qaqortup Katersortarfiani isumasioqatigiumavai. Eqqarsaatinillu nutaanik pilersitsisimasoq meeqqanut pingasunut anaanaasoq oqarpoq.
- Aaqissuusamut peqataanera eqqarsaatinik nutaanik pilersitsivoq, nammineq iliuusererusutamik misileerusulernermik pigisaqalerpunga. Angajoqqaaqqatinnut siunnersuutigerusunnarpoq eqqunngittoq pissanngikkutsigu suliaqartut siunniussaat paasilluarniarlugit apersuisarutta paasisaqarnerussagatta, taamaalilluni eqqunngittumik ingerlatitseqqiisarnerit unissinnaassagaluarput, meeqqanut pingasunut anaanaasoq Najaaraq Petersen oqarpoq.
Meeqqat atuarfiat pillugu Ph.d-mik ilinniarsimasoq Mitdlarak Lennert saqqummiisuuvoq, taassumap meeqqerivinni atuarfinnilu pitsanngorsaanissamut suleqataanissaminut ingerlaannarluni akuerisimavaa.
- Ilisimatusarninni meeqqat atuarfii ingerlanneqarneranut isornartorsiugara annerpaaq tassaanikuuvoq piviusoq aallaavinagu meerarlu qitiutinnagu ingerlatsisoqarnera. Taamaammat Kommune Kujallermiit saaffigineqarama nassuiaanneqarlungalu, innuttaasut peqataatillugit meeqqerivinni atuarfinnilu pitsanngorsaanissamut periusissiorniartut ingerlaannaq akuersinikuuvunga suleqataanissannut, Ph.d-mik ilinniarsimasoq Mitdlarak Lennert oqarpoq.
Kommune Kujallermi atuarfeqarnermut meeqqeriveqarnermullu immikkoortortaqarfiup aaqqissugaa, Kommune Kujallermi angajoqqaat peqataaffigilluassagaat ilisimatuup Mitdlarak Lennertip siunnersuutigaa.
- Angajoqqaanut siunnersuutigisinnaavara meeqqerivinni atuarfinnilu pissutsit naammaginanngitsutut isigigunikkit aaqqissuussamut peqataanissaat. Tassuunakkummi siunnersuutitik toqqaannartumik ingerlateqqissinnaavaat. Periarfissallu arlaqarput - ataatsimiinnernut ornigunnissamut periarfissaqanngikkaanni aamma nittartakkatigut siunnersuutit nassiunneqarsinnaammata, Mitdlarak Lennert oqarpoq.
Narsami Nanortalimmilu assinganik isumasioqatigiinnissaq maana atuarfeqarnermut meeqqeriveqarnermullu immikkoortortaqarfiup pilersaaarusiarileruttorpaa. Meeqqeriviit atuarfiillu periusissianik pilersaarusianut siunnersuutissaqaraani facebookimi quppernernut ukununnga allattoqarsinnaavoq:
Meeqqat siunissaat pillugu qaaqqusineq – Qaqortoq 2022
Meeqqat siunissaat pillugu qaaqqusineq – Narsaq 2022
Meeqqat siunissaat pillugu qaaqqusineq – Nanortalik 2022