Isumasioqatigiinneq ulluni pingasuni ingerlanneqartussaq pingasunngornermi oktobarip 18-ianni Nanortalimmi Ilaqutariit illuata pisortatigoortumik ammaanersiorneqareernerata kinguninngua aallartittussaq ilaatigut politikkikkut anguniakkat inaarnissaannik eqqartueqatigiiffiussaaq.
-Isumasioqatigiinnissami siunertaavoq Isumaginnittoqarfiup aaqqissuussaanerata nalilersoqqinnissaa aamma politikkikkut anguniakkat inaarnissaannut eqqartueqatigiinnissaq. Taakku saniatigut FN-ip nunarsuarmi piujuaannartitsinissamut anguniagaasa ilaat sulinitsinni qanoq atorneqarsinnanersoq aamma eqqartuisoqassaaq, Inunnut isumaginninnermi Ingerlatsivimmi pisortaq Nielsine Petersen oqarpoq.
Isumasioqatigiinnerup aallartinngilaarnerani Isumaginnittoqarfimmi pisortat aamma Ataatsimiititaliaq Alluitsup Paani oktobarip 17-ianni Klub Aqissiami nalunaaqutaq 10.00-miit innuttaasunut ataatsimiisitsissapput, taamatullu aamma Nanortalimmi Qujanartip illuani oktobarip 19-ianni nal. 19.00-miit ataatsimiisitsisoqassalluni.