Kalaallit Nunaata sineriaani utoqqaat illuini sulisoqarniarnikkut ajornartorsiuteqartarneq atuuttoq Qaqortumi utoqqaat illuani aamma takornartaanngilaq.
-Ajoraluartumik sulisoqarniarnitsinni ajornartorsiuteqartarpugut, akissarsiffinnimi sapaatillu akunnerata naanerani suliartunngitsoortoqarsinnaasarpoq; taamaattoqartillugulu sulisut suliartorsimasut suliassaqareeqalutik qaavatigut suliassaqarnerulertarput, Ajarsivasimmi aqutsisoq Naja Kriegel oqaluttuarpoq nangillunilu.
-Tamatuma kingunerisarpaa utoqqaat najugaqartut sulisunit ilalersorneqarlutik issiaqatigineqarlutik oqaloqatigineqarsinnaajunnaartarnerat, sulisummi pisariaqavissunik suliassaminnut, soorlu nangilersuinernut, uffaanernut isumagisassanullu allanut angummanniartariaqalertarmata.
Ajarsivasimmi sulisoqarniarnikkut ajornartorsiuteqartaneq aaqqiviginiarlugu aaqqiissutissanik ujartuisoqaleruttorpoq.
-Sulisorpassuaqarpugut sulilluartunik, sulisulli tamakkiisumik aalaakkaanerulernissaat anguniarlugu iliuuserineqarsinnaasunik aaqqiissutaasinnaasunillu ujartuileruttorpugut, aaqqiissuteqarniarnerli aningaasanik naleqartillugu piffissaq sivisusinnaavoq. Taamaattumik sulisut najugaqartullu ataatsimoorlutik eqqartueqatigiisinneqassapput, matumani paasiniarlugu najugaqartuniit sunarpiaq amigaatigineqarnersoq, tamattami utoqqartatsinnit atorfissaqartinneqarpugut, Naja Kriegel oqarpoq.