Ilaqutariinnut Sullissivimmi sullinneqartut, pinngortitami ilaqutariinnut piorsaanermi qulequttamut sammineqartussamut tulluartumik inissisimagaangata peqataanissamut neqeroorfigineqartarput.
-Aasaq manna qulequtarineqarpoq ”Attaveqaqatigiinneq” tassa meeqqat mikisut angajoqqaallu akunnerminni attaveqaqatigiittarnerat; Sullitagut mikisunik meerallit neqeroorfigineqarnikuupput, pisinnaasullu aasaq manna Nimerialimmut angallanneqarput, pisariaqartinneqartullu aallaavigalugit oqaloqatigiinnernik eqqartuinernillu ilaatigut immersorneqarlutik, Ilaqutariinnut sullissivimmi Psykoterapeuti Helene Morgensen oqaluttuarpoq.
Ukiuni arlalinngortuni Namminersorlutik oqartussat tapiissuteqartarnerisigut Kommune Kujallermi Ilaqutariinnut sullissivimmiit aaqqissuunneqartumik ilaqutariit ataatsimoortinneqarlutik piorsarneqartarnerat peqataasunit iluaqutigineqarluni peqataaffigineqartarpoq.
-Ukiut tamaasa qulequtarineqartoq allanngortarpoq, ilaqutariillu imminnut tarrarsorfigisinnaasut ataatsimoortinniartarpagut. Soorlu assersuutigalugu ilaqutariit inuusuttuaqqanik meerallit, inuusuttuaqqanik perorsaaneq qulequtaralugu aallaarsimaarsinnaasarput; aallaarsimaarnissamullu atatillugu peqataasussat pisariaqartitaat aallaavigalugit piareersaqatigereertarpagut, pilersaarusioqataatillugit peqataatillugit, Helene Morgensen oqarpoq nangillunilu.
-Ilaqutariinnut sullissivimmiit taamatut angallassisarnerput misigissutsikkut oqimaassinnaasaraluartoq ilaqutariinnit nuannisarfigineqarluartartoq malunnartarpoq, pinngortitamimi pisuttuarnerit unammiuaarnerillu assigiinngitsut meeqqaniit inersimasunut nuannisarfiusarput, piorsaanerlu misigissusilerinertalik illup iluanik aallussinermik aamma akisussaaffeqarfiusoq tamanit pissarsiffiulluartarpoq.