Nunaqarfinni Sullissivinni sullissineq ineriartortinneqalerpoq

Septembarip qiteqqunnerani pikkorissarneq Sullissivimmi sullissinerup pitsanngorsarnissaanik ineriartortinneqarnissaanillu siunertaqartoq nunaqarfinni illoqarfinnilu sulisunit pissarsiffiulluartumik Qaqortumi ingerlanneqarpoq.

-Pikkorissarneq  pissarsiffiulluarluni iluarineqartoq peqataasunit oqariartuutigineqarpoq. Nunaqarfittatsinni Sullissivinni suleqatigut ulluinnarni takukulanngilagut, pikkorissaqatigiinnitsinnilu qanimut naapinnerput ulluinnarni sullissinermi unammillernartunik naapittakkanik aamma avitseqatigiiffiummat iluarisimaarpara, Nanortalimmi allaffissornermi pisortaq, Adolf Silassen oqarpoq.

Pikkorissartut ulluinnarni Sullissinerminni atukkaminnik pitsanngorsaanissamut ineriartortitsinissamullu isumassarsiaqarluarput.

-Sullissivimmi sullinneqartut amerlanerusut Sullissivik.gl-imik atuisinnaanngornissaannut ilinniartitsinikkut qaammarsaanissaq, ilaatigut ineriartortikkusunneqartut ilagaat. Matumani Sullissivinni sulisut sullitaminnik ilinniartitseqqiisinnaanngornissaat siunertarineqarluni; tamanna aqqutissiuullugu ingerlateqqissavarput, taamannami ullumikkut pappiaqqanik atuinerujussuarmut aamma annikillisaataassammat, Ulla Rafaelsen, Narsami allaffissornermi pisortaq oqarpoq.

Pikkorissartut nunaqarfinniit illoqarfinniillu peqataasut 13-iusut pikkorissartinneqarnerat borgmesterimit nuannaarutigineqarpoq.

-Nuannaarutigeqaara nunaqarfittatsinniit peqataatitsilluni pikkorissaasoqarnera, ukiunimi arlaqalersuni nunaqarfinni sulisugut taama periarfissaqartarsimanngillat. Nunaqarfittatsinni Sullissivinni sulisuusut pinngitsoorsinnaanngilagut, taakkulu sulisitsisuminnik immersorneqartuarnissaat pingaaruteqarpoq. Taamaattumik una pikkorissaaneq siulliusoq aallarniutitut isigalugu siunissami malitseqartinneqarluni pikkorissaasoqartarnissaa isumalluarfigaara, borgmester Stine Egede oqarpoq.

Nunaqarfinni Sullissivinni sulisuusut pikkorissarnerat malitseqartillugu, kommunip iluani sulianik ingerlatitseqqittarneq suleqatigiinnerlu ataqatigiittoq sammivigalugit pikkorissaasoqarnissaa siunertarineqarpoq.