Septembarip 15-iani Hotel Narsarsuarmi innuttaasunik ataatsimiisitsisoqarpoq. Innuttaasunik ataatsimiisitsinermi Kommune Kujallermi Borgmesteri Stine Egede kiisalu Ineqarnermut Attaveqaasersuutinullu Naalakkersuisoq Erik Jensen, Kommunalbestyrelsimi ilaasortat arlaqartut ilanngullugit takkussimasunut 60-it missaanniittunut aallarniillutik tikilluaqqusipput.
Aallarniutigalugu oqaaseqareermata, inuutissarsiutinut tunngatillugu suleqatigiit Narsarsuarmi inuutissarsiutinut aallartinneqarsinnaasunut siunnersuutitik saqqummiuppaat. Juunimi innuttaasunik isumasioqatigiissitsinermi innuttaasut siunnersuuteqarnerisigut siunnersuutit suliarineqarput, siunnersuutillu Innovation South Greenlandimi pisortamit Kista Isaksenimit saqqummiunneqarlutik.
Innuttaasut peqataasut arlalinnik apeqquteqarput, ilaatigullu takornarialerinermut, sunngiffimmi sammisassanut, sulisunut atugassarititaasunut, mittarfimmut, unnuisarfiit siunissaannut, Naviairip silaannakkut angallattunik nakkutilliivissaata inissisimaffissaanut, sulisartunut aaqqiissutinut, Narsarsuullu siunissaa pillugu suleqatigiissitami najugaqartut sinniisaannut tunngasunik apeqquteqarlutik.
Naalakkersuisoq Erik Jensen ima oqaaseqarpoq:
”Innuttaasut taamak amerlatigisut takkullutik isummaminnik, kissaatiminnillu anngussimmata nuannaarutigaara. Naalakkersuisut suliaannut innuttaasut naammagisimaarinnittut misigisimavunga, tamatumalu saniatigut Narsarsuup Siunissaa pillugu suleqatigiissitaq najuuttunit aamma nersualaarneqarpoq. Ataatsimiinnermi innuttaasunik kommunimillu qanimut pitsaasumillu oqaloqatigiinnerput qujamasuutigaara. Kommune Kujallermi attaveqaasersuutinut tunngatillugu suliniutissat pingaarnersiorneqarnissaat pillugu kommunip siunnersuuteqarnissaa, Aningaasanullu Inatsimmi sinaakkutit iluini suliarisinnaanissaat Naalakkersuisut maanna qilanaaraat”.
Borgmester Stine Egede ima oqaaseqarpoq:
”Narsarsuarmi inuutissarsiutinik nutaanik ineriartortitsisoqarnissaanut soqutiginnittoqartoq, piumassuseqartoqartorlu innuttaasut apeqqutigisaasa oqaaseqaataasalu paasinarsisippaat. Sutigut tamatigut suleqatigiittoqartariaqarpoq, illuatungeriillu tamarmik qanimut oqaloqatigiittariaqarlutik. Nunaqarfimmi aallarnisaanissami, nutaaliornissamilu kommunip inuutissarsiutinik ineriartortitsinissamut ingerlatsivia tapersersuinissami pingaarutilimmik inissisimassaaq.
Tamatuma saniatigut sumiiffimmi, Kujataanilu attaveqaasersuutinik ineriartortitsinissamut suleqataajumalluni Ineqarnermut Attaveqaasersuutinullu Naalakkersuisoq Erik Jensenip oqariartuuteqarnera isumalluarnarpoq.
Suleqatigiissitami ingerlariaqqinnissaq
Narsarsuup siunissaa pillugu suleqatigiissitaq ilaatigut Kommune Kujallermit, Ineqarnermut Attaveqaasersuutinullu Naalakkersuisoqarfimmit, Mittarfeqarfinnit, Innovation South Greenlandimit, Sulisitsisunit, Savaatillillu peqatigiinnit sinniisoqartoq marsip qaammataanit arfinillit missaannik ataatsimeereerlutik. Politikkikkut piginnaatitaanini, suliassallu allassimaffiisigut suleqatigiissitamut suliakkiissutaasut tunuliaqutaralugit suleqatigiissitaq sulivoq. Suleqatigiissitaq pisortatigoortumik 2023-mi decembarip 31-ani atorunnaassaaq, suliassalli siusinnerusukkut naammassisinnaajumallugit suliassat pillugit ataavartumik aalajangiisoqarsinnaanera malillugu aamma sulillutik.