Septembarip 26-ianni Kommune Kujallermi kommunalbestyrelsi Narsami innuttaasunut ataatsimiisitsinerani inuuttaasut soqutiginnittut 30-it sinnillit oqaasertaleerusussusillit apeqqutissaqartullu takkupput.
Apeqqutigineqartut oqaatigiumaneqartullu assigiinngissitaarput soorlu: aqquserngit asfalterneqarnerat, illut nutarterneqarnerat, eqqagassalerineq, angerlarsimafinni sulisussaaleqineq, aapparisap isertitai apeqqqutaatillugit utoqqalinersiutinik appaanermut naammaginninnginneq, innuttaasunik sulisitsiniarnermi ajornartorsiutinut aaqqiissutaasinnaasunik ujartuineq, kulturikkut suliniutinik pimoorussisoqarnerunissaanut kissaateqarneq, immap naqqata salinnissaa, Kommunip aningaasaqarnerata killiffia, allarpassuillu.
Borgmesteri Stine Egede ima oqarpoq:
"Nuannaarutigaara ataatsimiinermi inuttaasut sammisanik assigiinngitsorpassuarnik eqqartuerusummata. Sammisat assigiinngitsorpassuit tamaasa unnuup ataatsip iluani eqqartorluarnissai ajornakusoorpoq, taamaammat ataatsimiititaliavut ukiumoortumik Kommunimi angalanerminni innuttaasunik ataatsimiitsitsisassapput. Taamaalilluni sumiiffiini assigiinngitsuni killiffii sukumiisumik saqqummiunneqarsinnaassapput, aammattaaq politikerit innuttaasut Kommunip sulineranik pitsanngorsarnisaanut isumassarsiaannik katersisinnaassapput.
Innuttaasunik ataatsimiisitsinermi innuttaasup ataatsip illoqarfimmi imigassaq ikiaroornartorlu aammattaaq aningaasanoorajunnerup ajornartorsiutaasarnerat eqqartorneqartannginneri oqariartuutigaa.
Stine Egede ima naggasiivoq:
”Innuttaasut aangajaarniutinik atornerluineq, pinngitsuuisinnaannginnerlu pillugit suleqataarusunnerat pitsaasuuvoq. Kommunimi inuuttaasut tamaasa kajumissaarumavakka atornerluinermik ajornartorsiutinut annikillisaaqqataaniarnerminut isumassarsiatik pillugit kommunimi pinaveersaartitsinermut kulturimullu sulisunut oqaloqatiginnissasut."