Suut tamarmik aallartiffeqarlutillu naaffeqartarput, inuunerup aqqusaagassai aamma taamaapput.
Henrik Nielsen ”Indaleeraq” 1942-mi inuusoq septembarip sisamaani 2022 eqqissivoq. Indaleeraq juunip aallaqqataani Saarlummi inuuvoq,
Aalisartut sulereerluni nunamiilernermini politikkimik sulineq pimoorullugu aallartippaa. Partii Siumut pilersinneqarnerani siulersuisunut ilaasortaalluni peqataasimavoq. Landsrådimi, bygderådimi, kommunerådimi, Inatsisartuni Naalakkersuisunilu politikkeritut sulinermini ilaasortaaffigisaasa ilagaat.
Politikkeritullu sulinermi saniatigut ukiorpassuarni peqatigiiffiit KNAPK aamma SIK ilaasortaaffigai. Indaleeraq inuunermini suleqataaffippassuaqarami ilisarisimasarpassuaqarpoq, taamaattorli nuimaniartuunanilu pingaarniartuunngilaq, inuiaqatigiinnullu sullissinissi pingaartitaralugu.
Pisariaqarfitsigut inuiaqatigiinni isummersortarnini ilisarnaatigaa, politikkeritullu sulinermini anguniakkani pimoorullugit anguniartarlugit.
Kalaallit inuiattut nukittunissarput pitsaasumillu atugaqarnissarput sulissutigisimavaa, ilaatigut nunatsinni namminerisamik erfalasoqalernissamik inuiattullu ullorsiortarfeqarnissatsinnik aamma suliniuteqaqataasimalluni.
Indaleeraq inuiaqatigiinnut sullisserusuttuuvoq, toqussi tikillugu inuiaqatiginni pisuni oqallinnernilu malinnaasarluni.
Indaleeqqap qimagunnerani kinguaavi tamaasa misiginneqatigaakka, ullunilu atukkassinnik nukissaqarluarnissassinnik kissaappassi.
Henrik Nielsenip Indaleeqqap qimatarai nuliani, meeqqani tallimat ernuttani ernutaqqiutinilu.
Stine Egede, Kommune Kujallermi Borgmesteri