Suliffeqarfik Milak Productions ApS ukiumi nutaamiit qimminut nerukkaatissanik ilaatigut savat perlukuinik akoqartunik Narsami tunisassiorluni aallartittussanngorpoq.
-Nuananarutigaarput Milak Productions ApS-p iliuuseqarneratigut savanik toqoraanermi perlukut ukiumut 40 tonsit missaaniittut eqqaannarneqartaraluartut maanna katersorneqarlutik qimminut nerukkaatissatut tunisassianngorlugit suliarineqartalertussanngorneri, borgmesteri Stine Egede oqarpoq.
Nunatsinni naatsorsueqqissaartarfiup kisitsisaatai aallaavigalugit siorna 2021-mi qimminut nerukkaatissat 1700 tonsit nunatsinnut eqqunneqarsimapput, tamannalu allanngortittariaqartoq Milak Productions Aps-imi piginneqataasoq isumaqarpoq.
-Nunatta avataani inuit nalulluinnakkatta ”eqqagassaataannik” nerukkaatissanik pisiortornitsinni aningaasat nunatsiinniit aniatippagut, tamanna allanngortillugu uagut Kalaallit nammineerluta iliuuseqarnissatsinnut piffissanngormat nerukkaatissanik tunisassiorneq aallartittussanngorparput, Milak Productions ApS-mi piginneqataasoq Ulloriaq Kreutzmann oqarpoq.
Qimminut nerukkaatissatut tunisassiat Narsami ukiumi nutaamiit tunisassiarineqalertussat nunatta uumasuinik akoqassapput.
-Savat perlukuisa saniatigut saarulliit, qalerallit puisillu akuleriisillugit karrinik akullugit blokkinngorlugit tunisassassiarissavagut, Ulloriaq Kreutzmann nassuiaavoq.
Suliffeqarfik Kommune Kujallermi tunisassiorfeqarluni ingerlalertussaq tigulluarneqarumaartoq borgmester Stine Egedep neriuutigaa.
-Kommunitsinni ineriartortitsinissamik siunertallit tamaasa tikilluaqquvavut, nuannaarutigaaralu suliffeqarfik atorluaanissamik siunertaqartoq aamma kommunitsinni ingerlatsilertussanngormat. Neriuppunga suliaq pitsaasoq nunaqqatitsinnik tigulluarneqarumaartoq, iluatsilluarlunilu ineriartorluarumaartoq, Stine Egede oqarpoq.