Kommune Kujallermi meeqqat inuusuttullu angerlarsimaffiup avataanut inissinneqartartut ukiuni kingullerni amerliartuinnavissimapput, tamannalu allanngortinniarlugu Isumaginnittoqarfiup aaqqissuussaaqqinissaanik siunertaqartumik misissuisoqarsimalerpoq.
-Misissuinitsinni paasisatta ilagaat Meeqqanut inuusuttunullu sullissinermi oqartussat aamma Ilaqutariinnut sullissiviup suleqatigiinnermikkut uangasissorujussuusinnaanerat; matumanilu suleqatigiinnerup nukittunerulernissaa siunertaralugu allannguivugut, Inunnik isumaginninnermik Ingerlatsivimmi pisortaq Nielsine Petersen nassuiaavoq.
Meeqqanut inuusuttunullu sullissinermi oqartussat aamma Ilaqutariinnut sullissivik siornatigut allaffeqatigiissimanngitsut, suleqatigiinneq nukittooq pilersinniarlugu allaffimmi ataatsimuulerput.
-Meeqqanik angerlarsimaffiup avataanut inissiinissaq pinaveersaartinniarlugu suleqatigiit ataatsimuulernermikkut akunnerminni sukumiisumik ikiorsiinissamut nalilersuisalissapput, Nielsine Petersen oqarpoq nangillunilu.
Isumaginninnikkut inatsit tunngavigalugu angerlarsimaffiup avataanut inissiisarneq periarfissaq kingullertut periarfissaavoq; ataatsimoorlunilu ikiorsiissutissanik eqqartueqatigiittalernermi ilaqutariit avissaartinnagit sullinneqarnerisa nukittunerulernissaat isumalluarfigaara, Nielsine Petersen naggasiivoq.
Qaqortumi Ilaqutariinnut Sullissivik aamma Meeqqanut inuusuttunnullu sullissisut ataatsimoorlutik Kirkegårdsvej B-809-nimi allaffeqalerput.