Kista Isaksen 49-nik ukioqartoq ilinniartitaanerup iluani pisortanilu allaffissornermi ukiorpassuarni misilittagaqarpoq. Kista Nuummi Niuernermik Ilinniarfimmi ilinniarnermut nakkutilliisutut sulinikuuvoq.
Kista ilinniagaqaqqaarami EVU-mi aningaasaqarnermut/allaffissornermut ilinniarpoq, ilinniartitaanerullu iluani inuussutissarsiuteqarluni sulinermi nalaani ilinniaqqiffinni atuartitsissuteqarsinnaaneq kiisalu aqqutissiuisutut aamma ilinniarsimalluni. Kingullermik ilinniagaqarami Ilisimatusarfimmi inuiaqatigiilerinermi kandidatitut misilitsinnermini allaaseraa: Kalaallit Nunaanni inunnik isumaginninnikkut meeqqanut aamma inuusuttunut suliniutit.
Kista piffissami 2013-2016-imi Kommune Kujallermi kommunalbestyrelsimi ilaasortaanermini Aningaasaqarnermut, Inuussutissarsiornermut Suliffeqarnermullu Ataatsimiititaliami ilaasortaavoq aammalu kommunimi isumaginninnermi pisortaanikuulluni.
Innovation South Greenlandimi siulersuisunut siulittaasoq Steffen Lund oqarpoq:
”Kista Isaksen-ip suleqatigilernissaa assorsuaq nuannaarutigaara. Kistap Nunatta Kujataanut ilisimasaqarluarneratigut, aqutsinermik misilittaqarneratigut kommunimilu sulinermik misilittaqarneratigut kommune, suliffeqarfiit aallarnisaasullu qanimut suleqatiginerisigut inuussutissarsiornerup ineriartorteqqinneranik ingerlatsisinnaasumik ISG pisortaqalissaaq”.
Kista Isaksen septembarip ulluisa aallaqqaataanni sulilissaaq.