Roskilde aamma Nanortalik ukiut 50-it sinnerlugit illoqarfittut ikinngutigiinnikuupput, ukiorpassuarnilu meeqqat paarlaasseqatigiitsillugit tikeraartittarnerat ileqquuvoq, tamannalumi illoqarfinni taakkunanni ilaqutariit nuannaarutigisaqisaannik suli ingerlanneqarluni. Ukioq manna Nanortalik ukiunik 225-nngortorsiorluni nalliortorsiorpoq, nalliuttorsiornerlu byrådimi ilaasortat aggustip 15-anni illoqarfiup nalliuttorsiorneranik malunnartitsiniarnermi peqataapput.
Roskildip borgmesteria Tomas Breddam ima oqaaseqarpoq: "Nanortallip nalliuttorsiornerata malunnartinneqarnerani peqataasinnaasimagatta nuanneqaaq, kiisalu kulturip paasisimasaqarfiginerulernera minnerunngitsumillu angalanitsinni inuit naapitavut assut nuannerput. Kommune Kujalleq soqutiginarluinnartumik ineriartorpoq, neriuppungalu tamatsinnut iluaqutaasussamik suleqatigiinnerput annertusarsinnaajumaarlutigu."
Angalaqatigiit ilaatigut suliffeqarfiit arlallit, atuarfiit, paaqqinnittarfiit, illukut Unesco-mit eqqissisimatinneqartut alakkarnikuuaat, timmisartoqarfiliornissamullu pilersaarutit takullugit.
Borgmesteri Stine Egede ima oqarpoq: "Tikeraarnerup iluatsittumik ingerlanera nuannaarutigaara. Kommunitta takutissornissaa uagutsinnut pingaaruteqarpoq, tassami tulluusimaarutigisavut kommunittalu periarfissai takutikkusussimavagut aammali ajornartorsiutivut ilanngullugit takutikkusussimallugit. Upernaaq manna Roskilde kommunimut tikeraarnikuuvunga, maannakkullu Roskildimiit maani kommunitsinneereermat oqaloqatigiilluartarnitta ingerlateqqinnissaanut tunngavissaqarlualerpugut, ajornanngippallu tamanna ingerlatissavarput suleqatigiinnissamik isumaqatigiissuteqarnissat siunnerfigalugu, assersuutigalugu katersuugaasiveqarnerup iluani".
Aggustip ulluisa 11-anniit 18-at ilanngullugu Roskilde byrådimiit angalasut ukuupput:
Borgmester Tomas Breddam; 1. viceborgmester Jette Tjørnelund; 2. viceborgmester Gitte Kronbak Nielsen; Aningaasaqarnermut ataatsimiititaliami ilaasortaq, Merete Dea Møller Larsen; Aningaasaqarnermut ataatsimiititaliami ilaasortaq Tina Boel Reugboe kiisalu Kommunaldirektør Henrik Kolind.