Qaqortumi eqqakkanik tigooraavimmi eqqakkanik poortuut ikkussuulluni piareermat misiligarneqarpoq, 35 tonsillu ullormut iluatsittumik poortuuneqarlutik.
Qaqortumi eqqakkanik ikuallaavik atorunnaasaaq, taarsiullugu eqqakkanik poortuisoqartalissalluni taamaasilluni umiarsuaq eqqakkanik aallerluni tikittalertussaassalluni. Ikuallaaviullu imaarnissaannut, atortussat kingulliit tikinnissaat utaqqisaaginnalersut ingerlatsinermut pisortap oqaatigaa.
- Eqqakkat ikuallaaviup iluaniittut piiarnissaanut kranip kingoraartissai utaqqivarput, taakku tikippata eqqakkat peeriarlugit tassa atortut sakkut tigooraavimmut nuussussavagut, taava ikuallaavik mutussaaq, Teknikkimut avatangiisinullu ingerlatsivimmi ingerlatsinermut pisortaq Pâlo O. Kûitse oqarpoq.
Eqqakkanik poortuineq iluatsilluarpoq, taamaattorli sulisut tamatumunnga suliaqarsinnaanissaannik ilinniartinneqaqqaarput.
- Poortuilluta misilikkatsigu sukkangaarmat ullormut 35 tons eqqakkat poortorpagut iluatsilluartumik, sulisut poortuinermut passussisinnaanermut ilinniartinneqarput, amerlanerillu ilikkareerlugu nalinnginnaasumik poortuineq ingerlanneqalerpoq.
Umiarsuaq eqqakkanik aallertartussaq aggustip septembarillu nalaani eqqakkanik aallissangatinneqarpoq, taannalu ukiumut sisamariarluni eqqakkanik poortoriikkanik aallertassaaq.