Asasakka ataqqisakka savaatillit, nersutaatillit, tuttuutillit, naatitsisartut, SPS-imi siulersuisuni ilaasortat, ataqqinaammik ilaasortat, Naalakkersuisut, najuuttullu allat tamassi tikilluangaaritsi.
Kommune Kujallermi kommunalbestyrelsimi nammineq pilersornerunissaq sinaakkusersorniarlugu politikkikkut anguniagassat pingaarutillit ilaagaat, taammaattumik ullumi ataatsimeersuarnissami inuussutissarsiutinik suliaqartusi tamassi, nunaateqarnerup uumasuuteqarnerullu ineriartorteqqinneqarnissaa tunaartaralugu eqqartueqatigiinnissaq tamatsinnut alloriarfiujumaartoq neriuutigaara.
Nunarsuatsinni pisut kingunerisaannik nioqqutissat akiisa qaffannerat assigiinngitsutigut nunatsinni innuttaasunut tamanut sunniuteqartussaavoq. Tamanna minnerunngitsumik nunaateqarnermik uumaasuuteqarnermillu ingerlataqartunut aamma annertuumik sunniuteqareerpoq.
Naggerissaatit, nerukkaatissat annertoorujussuarmik akitsorput.
Qularnanngilluinnarporlu aamma piffissap ingerlanerani ikummatissat akii aamma qaffattussaajumaartut.
Taama nalaataqarneq erloqinartorujussuusoq kialuunniit takorloorsinnaavaa, qularnanngitsumimmi uumasuutillit inuussutissarsiutimi iluanni ineriartortitsiniarnerannut ajoraluartumik annertuumik kalluaasussaavoq.
Kinaluunniit inuussutissarsiummini pinngitsoorsinnaanngisaminik akitigut kalluarneqaruni, inuussutissarsiummik ingerlataminik nangiarnartumut pisarpoq.
Soorlu sanaartortut sanaartornermi akit qaffappata sulinermut akigititatik qaffassinnaavaat, inuuniartariaqaramik.
Uumasuuteqarnermik inuussutissarsiornermi imaaliallaannagassaarpasinngilaq.
Allaqqunneqarsinnaanngilarlu Naalakkersuinikkut iliuuseqartoqartariaqarmat. Manna periarfissaq atorlugu Naalakkersuinikkut susassaqartut arlallit maaniinneri iluatsillugu iluunngarlunga qinnuigaassi, piffissaagallartillugu iliuuseqarnissaq pisariaqavimmat.
Ukiuni kingullerni uumasuuteqarnermik ingerlatallit amerliartunnginnerat eqqarsaatigalugu pingaaruteqarpoq Naalakkersuinikkut suliaqartut qanimut suleqatigiilluarnissarput. Kujataanimi savaateqarneq ukiorpassuarni ingerlanneqartoq, namminerlu pilersornerunissamut aqqutissiueqataasoq Annaasariaqanngilarput.
Naalakkersuisuni Kommuunimilu ungasippallaarneq tassunga killittariaqalerpoq. Naalakkersuisut, Landsbrugsråd, siunnersorteqarfik, kommuunilu immitsinnut qaninnerusariaqarpugut.
Taamaattoqanngippammi savaaqanik toqoraaneq annertusiartornavianngilaq, tamannalu nammineq pilersornerunissamut tunaartaqarnitsinni annaassallugu akissaqarfiginngilarput.
Taamaattumik Savaatillit peqatigiit suleqatigiissut, Siunnersorteqarfik, Landsbrugsråd, kommune aamma Naalakkersuisut qanimut suleqatigiilluinnarlutik nammineq pilersornerunissaq nukittorsarniarlugu suleqatigiilluarnissaat aatsaat taama pingaaruteqartigilerpoq allaqqunneqarsinnaanngitsoq.
Allatut ilusilersuisariaqalerpugut, nutaaliortariaqarpasilerpugut.
Immikkut ilisimasallit/ilisimatusartut ilaatigut suleqatigineqartariaqarput, aaqqissuussaanerusumillu suleqateqarneq ineriartortitsinermut iluaqutaasussaavoq. Taakku aamma siunertatsinnut suleqatiginerulertigit.
Silaannaap allanngoriartornerata silallu siulittorneqarsinnaannginneranut siunissamut piareersarnerit maannangaaq aallartittariaqarparput. Kalaallit Nunaanni nunalerineq pillugu nalunaarusiami 2019-imeersumi allaaserineqartutut ukiut ilaanni panernersuit pisarsinnaasut piareersimaffigisariaqarpagut.
Taamaattumik nunalerinermut qitiusumik immikkoortortaqarfiata kujataanut nuunneqarnissaa kissaatiginaqaaq, taamaalillunimi sullinneqartut qanimut avatangiiseralugit sulineq ingerlanneqarsinnaanngussammat.
Ukiup matuma aallartinnerani tusagassiutitigut sammineqarpoq Neqi A/S-ip ukiuni arlalinni amigartooruteqarluni ingerlasimanera. Suliffeqarfillu nammineq aningaasatigut napatissinnaanngimmat Naalakkersuinikkut suliaqartut saaffigineqarnissaat saqqummiunneqarpoq.
Suliffeqarfik amigartooruteqanngitsumik ingerlassappat uumasut neqiliortut amerlisarneqarnissaat allaqqunneqarsinnaangilaq; uumasuuteqariiaatsillu allat eqqarsaatigalugit inerisaaniarnermi aqqutissiuussisussanik periarfissagissaarnerusariaqarpugut. Inuusuttunut periarfissat ersarinnerusunik aqqutissiuussinissaq pilerinarsaanissarlu suliarisariaqarparput.
Savaateqarneq eqqarsaatigalugu savat toqoraaviliaanneqartartut amerlineqassappata savat inaat anginerusut, suliffigiuminartullu inerisagassaapput; narsaatinillu piorsaanissaq allaqqunneqarsinnaanani.
Ullumikkut savaatillit akornanni savaatilinniit savaatilinnut savaatigineqartut amerlassutsimikkut assigiinngillat. Taamaattumik savaatiliussagaanni savaatigisat ikinnerpaaffilerneqartariaqarneri eqqarsaatissaavoq, matumani kaaviiaartitat akiitsunut malinnaasinnaasariaqarneri taamatullu imminut inuutissinnaanissamut naleqquttuusariaqarmata.
Qanoruna iliorluta savaateqarneq nersutaateqarneq uumasuuteqariaatsillu allat inerisarniarlugit kajumminerulersitsisinnaasugut? Uumasullu neqiliortut amerlisarniarlugit aqqutit suut atortariaqarigut? Savat meqqui eqqaannartakat sussavagut ?
Ullumikkut savaatilinni amerlasuuni savat inaat pisoqalisimasut sulliviupput, inuussutissarsiuteqartullu akornanni inerisaaniarnermi atortut nutaanngilisartut nutarterneqartuartariaqartut savaatillit nersutaatillillu ulluinnarivaat.
Kommuunimit siunnersorteqarfimmik ataatsimeeqateqartarneq aallartinnikuuarput; tamannalu siunissami aggersumi qaninnerulernitsinik suleqatigiissutissanillu pilersitsiortulerumaarnitsinnik nassataqarumaartoq neriutigaara.
Naatsorsuutigaarattaaq ISGmik inerisaanitsinni siunissami nunalerinermut uumasuuteqarnermullu sammivilinnik aammattaaq inerisaajumaarluta.
Nalunngilara ineriartortitsiniarnermi suliat piffissaq sivisooq atorlugu suliarineqartartut, aamma politikkikkut anguniakkani taamaappoq.
Kommuunitut aqquserniornernut pilersaarutiginnerunissarput angorusupparput, ullumikkutut ineriartortitsinissamut atugassat aqquserngit ukiukkut kuuguttarnerinnut annertuumik atortarput. Aqquserngit talliartortillugit aamma soorunami iluarsagassat amerliartortarmata. Taamaattumik aqquserngit kuuguttarfiisa misissorluarneqarnissaat ullumikkorniillu allaanerusumik iliuuseqarluni suliarisalernissaat kommuunimiit suliarerusupparput.
Pinngortitarput kusanassutsimigut naliitsoq atorluarlugu uumasunik neqiliortunik amerlisaanissamut, naatitassinnik tunisassiornikkut, savaateqarfinnilu takornariaqartitsinermik inerisaaqqinnissatsinnut periarfissaqarluarpugut; taakku ataatsimut suleqatigiinnitsigut ineriartortinneqaqqinnissaannut isumalluarpunga, ataatsimoorlunimi anguniagaqarnermi nukik annertunerusoq pigineqartarmat.
Ataatsimeersuarneq tamanit pissarsiffiunissaa neriuutigalugu tamassi tikilluaqqoqqippassi – ataatsimeersuaarluarisa.