Asasakka Nuna Avannarliit Killiit siunersoqatigiiffianni ilaasortat, aallartitat, Naalakkersuisut, susassaqartullu allat ataatsimiinnermi peqataasussat tamassi qamanngavik Kalaallit Nunaata kujataanut tikilluangaaritsi.
Nuannaarutigaara kommune Kujallermi borgmesteritut kiinnat ilisarnartut siusinnerusukkut qanimut suleqatigisarsimasat takoqqillugit, nunatta kujataanut pinngortitamigut avatangiiserissaartumut tikilluaqqusinnaagakkit.
Qaqortup illoqarfiani qalipaatigissaartumik avatangiiseqartumi ataatsimiigiarlusi tikinnissinnut atatillugu kujataani pinngortitaq avatangiiserineqartoq nukissanik aallerfigalugu isumassarsiorfigisimassagissi neriuutigaara.
Kujataami sorpassuartigut assigiinngitsunik immikkuullarequtimigut ilisaritinneqarsinnaasoq aamma ilinniartoqarfissuuvoq.
Campus Kujallermi qiviaannaraanni ilinniarnertuunngorniat, allaffimmiunngorniat pisianniarfimmiunngorniat aamma takornarialerisunngornianut ilinniarfiuvoq. Taakku saniatigut Upernaviaarsummi nunalerinermik uumasuuteqarnermillu ilinniarfik aamma Narsami Inuili, nerisassiornermut ilinniarfik, kommunitsinni ilinniarfiit ilagaat.
Nuna Avannarliit killiit siunnersoqatigiit ataatsimiinnissaanni eqqartorneqartussat inuusuttatsinnut siunissaannullu tunngasuupput. Taamaattumik ilinniarfiit kommunitsinni avatangiiserisagut, nunani avannarlerni inuusuttut ataatsimoornerulernissaannut aqqutissiusseqataasinnaammata suliniuteqarnissamut isumassarsiffigisimassagisi neriuutigara.
Inuusuttattami nunani avannarlerni inuusuttoqatiminnut attaveqarnerulernissaat kommunitsinniit tapersersugaraarput, siunissamilu aggersumi tamatuma annertusarnissaanut siunnerfeqarluta.
Aasaq manna Savalimmiunut tikeraarnissarput pilersaarutaagaluarpoq, matumani kommunitut Savalimmiuni illoqarfimmik ikinngutitaarnissaq ilaatigut siunertaavoq, soorlu Islandimi Akranes ikinngutigigipput.
Taamatut illoqarfimmik ikinnguteqarneq pitsaasuuvoq, taamaaliornikkummi kulturikkut paarlaaqatigiinnikkut ilisarisimaqatigiilerneq attaveqaqatigiinnerlu aallartittarmat.
Tamanna nunani avannarlerni inuusuttuarartatta inuusuttattalu imminnut ilisarisimanerulernissaannut aqqutissiuusseqataajumaartoq qularinngilara, isumalluarfigalugulu.
Kujataani qitiusumik mittarfittaassaq 1500 meterinik takissuseqarluni maani Qaqortumi sananeqarnissaanut sulisoqalereerpoq; naammasseriarpallu kujataaniit nunanut avannarlernut angalaniarneq aatsaat taama periarfissagissaartigilissaaq, ukioq kaajallallugu.
Taamaattumik kujataata tunniussinnaasai eqqarsaatigalugit siumut isigisumik suliniuteqarnissammut piffissatsialaavoq.
Inuusuttatta siunissaat, inuusuttagullu aallaavigalugit ataatsimiinnissami angusaqarluarnissassinnik kissaallusi tikilluaqqoqqippassi.
Ataatsimiilluarisi!